البايرة

الجزء 1 : غادي نعاود ليكم قصتي ... ومعاناتي مع العنوسة... او كيف كنقولو بدارجة ديالنا البايرة.... انا اسمي نزهة في عمري حاليا 63 سنة نبدا ليكم من طفولتي كنت ساكنة في فيلاج صغير انا وسطانية في خوتي احنا 6 خوت 4 دراري و 2 بنات دوزت طفولة ديالي عادي الحمد الله احنا ناس ما عندناش وما خصناش عزيز عليا النشاط والضحك بزااف وصلت سادسة ابتدائي وجلسوني من مدرسة حيت قالك عيب البنت تكمل قراية خاصة وكوليج بعيدة علينا منين نجحت وشحال وانا نبكي بغيت نكمل قرايتي كنت كنتمنى نولي شي حاجة في مستقبل ولكن الاسف عندنا نظام ديكتاتوري وليت غير في تمارة شقا ديال دار كلو ولى عليا واختي صغيرة فين وفين فاش كتعاون كلشي ولى مني وليت الخدامة ديالهم حرموني من دراسة كويتها في قلبي وسكت ولكن لي زاد فقصني كيجوني خطاب وكيردوهم كيقولهم راها باقية صغيرة منعرف صغيرة علاياش يمكن على فم الضبع مننين جلست من مدرسة وانا هازة دارنا فوق كتافي المهم هذا مكتاب ومكاينش لي يرد الوالد الكلمة لي قالها هي لتكون قالك بيض قولي بيض خوتي دراري تزوجوا جوج فيهم بعاد علينا في مدينة اخرى خدامين واخرين سكنو معانا في دار وهنا غادي يبدا تكرفيس مكاينش العوين نظرا هادو لي خداو خوتي تزوجو بجوج خواتات وكانو خدامين في واحد معمل كيفيقو من 6 صباح حتى 5 العشية كيجو مساليين وانا كلشي مني منقدرش نهز العين دايريني خدامة ديالهم ...

الجزء 2 : مرات خويا اسمها حفيظة .. نزهة ونزهة عفاك اختي رديلي شي مقراج ديال الما بغيت نكمد رجيلاتي انا قلت فخاطري تكمديهم في جهنم انشاء الله ياله غادية كنسمع الواليد حتى هو كيعط وا نزهة فينك وراه فيا جوع حطي العشا معرفت ياربي لمن نعطي راسي بقيت على هاذ موال شوية ولدو عيالا ت خوتي ووكملو فترة نفاس وبديت انا في تربية ولادهم مكلفة بكلشي وديما كندعي ربي يرزقني بشي ولد الحلال لي يهنيني من هاد تمارة ونستقر حتى انا يكون عندي راجل ووليدات ولى هذا هو حلم ديالي ووليت بانية امل كبير على زواج كيبان ليا هو المنقذ كانو كيجوني عروض ديال زواج بزاف ولكن بــــا الله يغفر ليه ديما على فمو راها مزالة صغيرة وانا وصلت سن زواج بقيت على هاد الحال حتى وصلت 36 سنة ولاد خويا ولاو طول مني الواليد الله يرحمو تعدى عليا خلاني ترافة وخدامة على عيالا ت خوتي وولادهم واحد نهار كنت خارجة كنتقدى الخضرا غادية في سوق وواحد راجل كيشوف فيا وانا تخلعت مع انا كيف عاودت ليكم دوزت حياتي غير في دار وشقا مكانش عندي احتكاك بالجنس الاخر نهائيا من غير المحارم ديالي خوتي وولاد العائلة قليل في شي عواشر ولا مناسبة اوى نكمل ليكم غادية ومخلوعة شوية هو يجي عندي داك سيد عفاك اختي ممكن نهدر معا ك انا شفت فيه وانا نهز جلابتي وضربتها بجرية وحدة هههههههههه حتى حيدت من سوق عاد بديت نضحك على راسي وعلى طريقة لي درت ههه مشيت كنطيب الغدا وغير كنفرنس داك نهار هكاك غير نتفكرو ونضحك داز على هادشي سيمانة حيت سوق اسبوعي راكم عارفين فيلاج ما مشيت انا مشا خويا تقدا داكشي وجا دخل لعندي حط خويا داكشي في كوزينة وهو يقوليا .. نزهة انتي صبرتي معانا بزااااف وعاونتينا في تربية ولادنا دبا جا الوقت لي تديري دارك حتى انتي ولادك شفت فيه وانا وتغرغرو عنيا بدموع وانا نقوليه .. خويا شكون يديها في وحدة بحالي راني شرفت ووصلت 36سنة قدي ولادهم راه كيقراو في اعدادي عايشة كنتسنى غير امتى نموت اما زواج فات عليا تران وبديت نبكي هو يعنقني خويا اول مرة يحسسني بحنان ديالو قاليا .. متقوليش هكا ربي كبير وغادي تفرحي وديري ولادك ودارك وانت قلبتيها لينا دراما راه اليوم جا واحد السيد بغاك للزواج في عمرو 39 سنة كيقلب غير على معقول هو كان مزوج بنت عمتو ولكن طلقها غير بصدفة لقى معمرة ليه مخدة بالحجابات وسحور وطلقها ومعندهومش الولاد وراه خدام في تجارة وعايش هو ومو وباه وخوتو كلشي مزوجين هو فاتحني قلتو مرحبا ودبا جيت ناخد رايك انا حسيت بالفرحة وبواحد بصيص امل بزربة قلتلو واخة اخويا لي بغتي ... خويا على بركة الله انا نتصل به دبا ونحددو ا امتى يجي ويجيب والديه المهم كنصاوب الغذا وانا في قمة سعادة وكنبني احلام وحتى انا غادي نتهنى من كلمة بايرة يتبع

الجزء 3 : حطيت الغذا كنتغذاو هو يقول ليا خويا قدام مراتو ومرت خويا لاخور ناس انزهة جايين من دبا يومين وجدي راسك ودبا نعطيك شي بركة تقداي وشري ليك شي حويجا وهي تنطق مرت خويا .. شكون هاد ناس ؟ خويا بدا كيضحك هاد ناس طالبين راغبين في اختي نزهة مسكينة صبرات معانا وكبرات لينا وليداتنا وجاها الوقت باش حتى هي تتدارك الامر ودير دارها وولادها ولالا مرات خويا .. وهي معجبهاش الحال بغاتني نبقى حياتي كلها نخدم عليها ما قدها كاع شبابي لي ضاع انا فرحت بزاف وشريت قفطان ما بهش على قد فلوس لي عطاني خويا وجا وقت فاش غادي يجيو ناس لبست قفطاني و درت فولاري وشوية الكحل في عنيا بعد ما وجدت كلشيحيت مكاينش لي يعاوني عيالا ت خوتي ما ممسوقينش ليا ومحملنيش نتزوج مني طياب عمرت اتاي عروسة كدخل بصواب وزغاريد انا داخلة بحال الا ام عروسة دخلت كنرحب بناس وهازة صينية اتاي سلمت عليهم ورجعت جبت الحلوى كلشي هادشي ما همنيش المهم هي نحيد من هاد العيشة صافي هدرنا قالو نديرو العقد من هنا 4 ايام واخة مو كطلع فيا وتهبط منعرف مالها معجبهاش الحال غير كدور في عينها وجالسة بحال الا جالسة على جمر انا كاع داكشي متسوقتش ليه بغيت ندير وليداتي ونتهنى من لقب بايرة فعلا جا نهار العقد كنتسناو العريس تعطل انا الله يستر قلبي مقبوض عليا وممرتاحاش اوى باركين عند عدول مكاينش حسو شوية عاد كنشوفوه جاي هو ومو خويا قاليه .. مالك على هاد تعطيلة ياك لباس ياكما وقعات ليكم شي حاجة في طريق هي تنقز موشوف لي نطولوه نقصروه ولدي ما رخيص عندي حتى نزوجو وحدة بايرة في عمرها 36 سنة انا بغيت نفرح به ونشوف ولادو قبل ما نموت ماشي نجيب اختك تاكل وتشرب بغينا بنت مزال صغيرة ولدي فاش خطبها سحابلو مزال صغيرة مع هي ماباينش فيها سن ولكن اختكم بحال ارض بور ما تنفع ما ضر انا غرغرو عنيا ونزلو دموعي بحال شلال وهي تقوليا ما تبكيش مزال يجيك شي واحد يكون مزوج ومرتو ماتت وخلات ليه ولاد تعاونيه فيهم بهكا زادت جرحاتني كثر تم خويا ناض ليها شوفي هدرتي بزااف وحتارمت شيب لي فراسك وقلت مرا كبيرة وقد والدة الله يرحمها ولكن انتي غير ما زايدة شوية هو ينوض ولدها وشنو بغتي دير كاع بسلامة بقاو مني منك مني منك حتى ضاربو وصلنا جدارميا يتبع

جزء 4 : ولاو تما تصالحو وكل واحد تنازل على دعوة فاش رجعنا عيالا ت خوتي ليقتهم وصلاتهم الخبار وكيقرقبو الناب بيا وكيضحكو وكيتغامزو صافي مشيت حيدت حوايجي بقيت جالسة كنبكي على زهري العوج دازت اسبوع على داكشي حتى تم خويا الكبير بغى يزوجني لواحد شارف ولدو الكبير كبر مني مبغيتش وضربني وقاليا صافي غادي تزوجيه بزز بغتي ولا كرهتي من تما طاحت في بالي فكرة وحلفت ما باقي نجلس في هاد فيلاج ديال النحس قلت نبدل العتبة لعل وعسى نتفك من عقدة عكس زواج ويسر ليا الله صافي مقدرتش مزال نعيش هاد عيشة محبوسة في دار ومقابلة ولاد عيالات اخرين بصح راهم من دمي ولكن صافي صبر تسالا ليا وياريت كنسمع شي كلمة ديال الخير وكملوها دايريني ضحكة وليت انا بهلوان ديالهم فعلا خليتهم حتى نعسو وجمعت حوايجي وشي فلوس عندي وواحد دبليج ديال ذهب خلاتو ليا الوالدة قبل ما تموت صافي توكلت على الله ركبت في طاكسي كبير حتى نزلت المدينة الكبيرة عاد موراها مشيت لمحطة ديال الكيران كنقول فين نمشي فين نمشي بان ليا كرسون ديال الكار كيغوت بسميت مدينةالدار بيضاء توكلت على الله وركبت بعد 3 سوايع ونصف لقيت راسي تما ما عارفة حد واخة في عمري 36 سنة ولكن راه نية وفشكل ولكن غير انا كنخاف من بنادم بزاااف مشيت بعدة شريت ليا واحد خبزة ونص لترو ديال الحليب وجلست فواحد الجريدة سديت بعدا جوعي قلت اول حاجة نديرها نمشي نشوف شي بنيقة فاش نسكن قلت نسول شي حد انا مكنزعمش على رجال بزااف دايزة واحد شابة تكون في عمرها ديك 22 سنة وانا نوقفها انا ... سلام عليكم اختي سمحلي واخة برزطتك انا غريبة على هاد مدينة قبل ما نكمل كلامي هي تقوليا سمحلي اختي والله حتى انا غريبة هنا وغير كنقرا في لافاك ومعنديش باش نعونك ... وانا نطق واقيلة فهمتيني غلط اختي انا مكنطلبش انا ماشي متسولة انا بغيتك غير تعاونيني الا كتعرفي شي حد كيكري البيوتة للشهر وشي ثمن على قد الحال انا يالله جاية من واحد فيلاج مكنعرف حد هنا البنت.. ايه بحرة نيت خوى واحد البيت قبالتنا ولكن المرا كتكري غير الطلبة صحاب لفاك منعرف واش تبغي تكري ليك المهم زيدي معاية ويكون خير .. انا ... ربي يخليك اختي الله ينجحك ويسر امرك .. بلا جميل اختي .. انا .. سميتي نزهة وانتي انا سمية مشرفين اختي صافي بقينا غاديين دخلنا لواحد حي شعبي وفيه ناس بزاااف وولاد كيلعبو عامر يتبع

جزء 5 : حلات الباب بساروت قالت لي تفضلي وهي كتعيط خالتي امينة وا خالتي امينة ....... هي تخرج واحد مرة صحيحة يعني غليظة وبيضة سلام ابنتي سمية اش حب الخاطر شوفي اخالتي امينة واش الشومبر لي قبالتنا مزال خاوي لا ابنيتي جاو واحد جوج بنيات اليوم بحال وجهك كراو فيه ياك لباس سمية ... غير هاد سيدة كتقلب بغات تكري شي بيت وقلت ليها راه موجود الا بقى خاوي لالا...لا ابنتي كريتو هاد صباح فاش خرجت جا سمسار... انا حسيت براسي مخنوقة وغير كنشوف فيهم معقلت حتى بديت ندمع ههه انا الا ما لقيت حل كنبقى نبكي انا هي عيشة دميعة هي تشوف فيا ديك سيدة مالك ابنتي كتبكي هي تنطق سمية ... راه اخالتي امينة هي برانية على المدينة ومعارفة فيها والو يالله نزلات....خالتي امينة اوى اش غادي نقولك ابنتي معندك لا عائلة لا والو لا الالة امينة ما عندي حد من غير الله سبحانه وتعالى وجيت قاصدة هاد مدينة ومقصود الله ولكن هكا ديما زهري عوج من جميع جوايه... الالة امينة ... شوفي انا غادي نستضفك اليوم فداري بدما تشوفي ليك شي حل ولا نسول ليك سمسار يقدر يلقة ليك شي بيت فين تسكني دخلي دبا رتاحي ويحن مولانا...انا ..ر بي يخليك خالتي امينة الله يخلي ليك وليداتك ويرزقك ربي بشي حجة وانت اختي سمية الله ينولك لي فبالك وسمحلي ليا بزاااف اختي سمية ... بلا جميل اختي نزهة خليتك على خير الله ..انا ..يعاونك وينجحك دخلت مع الالة امينة لدارها امينة ... دخلي ما تحشمي انا راه عايشة بوحدي عندي ولد وبنت بنيا راها مزوجة والولد راه كاين في الخارج وانا كنكري لطلبة كيعمرو عليا ومنها كنعاون على زمان اوى انتي اشنو قصتك ومنين انتي... انا ... اش غادي نقولك اختي امينة انا فعمري 36 سنة لحد دبا مزال عازية با الله يسمح ليه خرجني من مدرسة موراها زدت لتمارة وشقا ولي جا خطبني كيقوليه مزال صغيرة بديت كنكبر في العمر مات الواليدة موراها مات الواليد وبقيت مع خوتي عيالتهم خدامين وكلشي عليا بحال خدامتهم ومن فوقها نسمع خل وذنيا وهدرة من نتهنى من عذاب و5 صباح وانا واقفة على رجل وحدة كنعس مكنعقل على والو ونوض ولادهم كبرتهم وهزيتهم ومنين قلت غادي نتهنى من عذاب وتمارة جاني خطبني واحد سيد نهار بغينا نديرو العق مو عايرتني وقالت ليا انتي بايرة وفايت فيا الولاد وميمكنش نولد نظرا للسن ديالي واخة داكشي بيد الله وموراها خوتي قررو يزوجوني بواحد شارف بززمنين وقع هادشي صافي مقدرتش مزال نبقى هكا حياتي وصحتي نضيعها عليهم هزيت حوايجي وقلت نعيش بوحدي بلي قسم الله ونشوف شي خدمة شريفة ونقابل ديني وصلاتي ولنبقى جري عليا نجري عليك ونربي ولاد الغير ونسمع هدرة من فوق عايشة على اعصابي في ديك دار هادي قصتي الالة امينة ... ابنتي باك الله يرحمو كان غالط وخوتك حتى هما غلطو شافو غير مصلاحتهم من كبرو ولادهم عاد بغاو يزوجوك ولكن فات الفوت انا ... وايه اختي امينة فات الفوت راه بنات تما في فيلاج 18 سنة وعندها جوج وليدات لي قدي تما ولادها كيقراو في لافاك الحمد الله على كل حال يتبع

جزء 6 : خالتي امينة ...نوض نقلي شي بيضات نتغذاو بهم راه كيضروني ركابي مشكيت عليك ما خرجت تقديت انا .. شوفي اخالتي امينة ما تكلفيش راسك لي كاين انا ناكلو معاك الله يكثر خيرك غير منين سمعتي ليا وفتحتي ليا باب دارك هادي هي دنيا ومافيها نضت انا بدلت عليا وتوضيت وصليت لقيت خالتي امينة حاطة البيض وزيتون كحل وعمرات اتاي خالتي امينة .... جلسي ما تحشمي وكولي بالصحة وهادي مضيافتك ابنتي.... انا ربي يخليك اخالتي انا راضية غير بالخبزو الما بركة عليا المهم الحمد الله كلينا شبعنا جمعت داكشي غسلت المعان وكان دنيا شوية موسخة وكوزينة حالتها خالتي امينة... قالت ليا ابنتي انا عايشة بوحدي لي قديت عليها كنديرها ولي ما قديت كنخليها ... ومع انا مولفة تمارة ودمير قلت ليها غي رتاحي مناش من العاجزين مريت ليها المعان بالجكس وحكيت الكوزينة بالتيد وجافيل خليتها كتشعل بالنقاوة شهوة منها ومعان كبريو وكملت ضربتها بتسيقة للدار وهي كل ساعة تعيط والله يهديك ابنتي رتاحي راه انتي ضيفة زعمة وانا ما ممسواقاش هاك بالك بحال الا خدامة بالبريز ههههه حتى خليت ديك دار كتشعل خالتي امينة ... والله يا ابنتي سمحليا بزاف عذبتك اليوم معاية انا ... لا هانية راه هادشي لي درت والله ما يجي حتى شوية قدام تمارة لي كنضرب على قلبي كل نهار في دارنا بغيت نقول لي كانت دارنا تلقى خوتي كيقلبو عليا ولا محال وبديت تاني كندمع وخالتي امينة كتواسي فيا المهم نعست ديك الليلة وانا كنفكر كفاش غادي ندير وباش غادي نعيش وكفاش نلقى خدمة افكاري كلها مخربقة بقيت هكاك كندي ونجيب حتى نعست يالله بدا شعا دخل البيت نضلت توضيت وصليت لقيت خالتي امينة مزال ناعسة في بيتها قلت بلا منفيقها لبست جلابتي وخرجت نتقدة باش نطيب الحريرة عزيز عليا نشربها مع صباح ديما والدة الله يرحمها كتقول لينا راها زينة كتغسل المصارن خرجت كنسول على حانوت تقديت شريت دشيشة وحليب وكوميرا ورجعت لقيتها مزال ما فاقت انا مولفة نفيق بكري مشيت طيب حريرة وفيضت الحليب وحطيت كومير وزيت وزيتون يالله قاديت داكشي ها خالتي امينة فايقة خالتي امينة ... صباح الخير انزهة الله ابنتي اش هادشي مالك فايقة وزايداها معذبة راسك وموجدة الفطور انا .. لا مكاين لا عذاب المهم صلات وجات كتفطر فطرنا ونضت جمعت داكشي غسلت المعان ولبست جلابتي انا .. خالتي امينة كنشكرك بزااف على ترحيبك بيا واستضافة ديالك واخة مكتعرفنيش فتحتي ليا باب دارك ودبا جا الوقت لي نمشي فحالي وشكرا والله يخلي ليك وليداتك ومنساش خيرك اخالتي اميينة شوفي انتي باينة ليا بنت ناس وظريفة وبعقلك هكا قاليا احساسي انا كيف قلتلك بوحدي عايشة الا بغتي تقدري تبقاي عايشة معايا حتى تلقاي ليك شي حل انا ... تصدمت وبديت تاني كندمع الله يكثر خيرك ويرزقك شي حجة وبديت في دعاوي ههههه وترميت عليها عنقتها حتى كنت باغية نخنقها ههههه .....يتبع

جزء 7 : وهنا غادي تبدا حياتي الجديدة ولكن تفقت انا وياها نجلس معاها بشرط نقلب على خدمة ونبقى انا نقوم بمسؤولية ديال الصاير والماكلة باش منتسماش ستغلتها وهي وافقت صافي داكشي لي درنا مرة نتقدى انا مرة تقدى هي وعييت بتقلاب على خدمة ووالو وانا لا دبلوم لا شهادة لا حتى حاجة كنقلب غير في مطاعم وقهاوي حتى لقيت واحد سنااك قاليا خصهم مرا تغسل المواعين ومع انا مولفة شقا مترددتش وقاليا نخلصك بنهار 50 درهم قلت الحمد الله الخير والبركة وقاليا توقيت من 7 صباح حتى 10 ليل جاتني قاسحة ولكن قلت معليش اللهم العمش ولا العمى اوى بقيت خدامة هكاك نهار الروبو جمعة شهراين وانا خدامة كنرجع ميتة طباسل وداك الويل والكيسان مكيقاداوش صافي جمعت شوية ديال الفلوس مع غير انا وخالتي امينة صاير قليل ديك 50 درهم الحمد الله كنشيط منها شوية ولكن بيني وبينكم سبب ماشي عييت بتمارة وغسيل ووقفة هادي بصح من اسباب ولكن التحرش لي ديما كان كيتحرش بيا مول داك صناك وفاش كنقولو حدك تما راه انا ماشي ديال داكشي وزيدون انا مزال بنت وبشرفي كيقوليا راكي شرفتي مع راسك ومكاينش لي يتزوج بك اللهم دربها بركلة وعيشي حياتك او تبقاي محرومة ديما كنسمع نفس الموال صافي وفعلا درت لفراسي وخرجت مشيت لدار لقيت خالتي امينة مريضة وكاينة معاها سمية عقلتو عليها هادي البنت لي تلاقيتها طالبة كتقرا وكارية عند امينة تخلعت وقلبي تهز انا ... مالك اخالتي امينة لهلا يضرك اش وقع ليك ياك لباس مالها اسمية سمية ... والو انا دقيت تهرس لينا راس ديال البوطة بغينا نطيبو العشا وقلت نشوف خالتي امينة كنعيط كنعيط حلات لي الباب وطاحت انا .. الله يا ربي ديما كنقولك شربي دوا كتنسايه غذاا انشاء الله نديك عند طبيب هادشي كثر وحتى وجهك صفر سمية .. المهم منين جيتي اختي نزهة انا غادي نمشي بغيت نراجع قبل ما نعس انا .... واحة احبيبة الله يوفقك سمية .. تصبحو على خير ومكاين باس عندك خالتي امينة امينة .. لهلا يوريك باس ابنتي وسمحليا عذبتك معاية الله يفرحك ويرضي عليك .... سمية .... بلا جميل اخالتي راك بحال الواليدة يتبع

جزء 8 : انا في داك الوقت ممرتاحاش وغير كنخمم بقات فيا خالتي امينة المهم كيف فقت وقفت عليها خالتي امينة نوضي نوضي ياك لباس ابنتي نزهة اش كاين والو باس نديك تشوفي طبيب خالتي امينة ... لالا ما غادية انا مكنحملش سبيطارات ولا اطباء سيري فحالك مع هاد صباح وبدات تضحك هي تقوليا اامينة ... راه والو واقيلة غير طونسيو صافي بدينا كنضحكو صراحة كنت كنشوفيها عائلتي ولفتها بزاف وحتى هي كنا حاسين ببعضنا لواحد درجة متصورش اوى واحد نهار جالسة كنخمل ونجمع دار وخالتي امينة خرجات مشات عند واحد جارتها كنسمع دقان مشيت حليت هزيت عنيا وانا نشوف اشمن منك يا زين سبحان من صوره عنين كبار وعسليين ولحية رقيقة ومقادة وطولة وتجريدا تفكرت فاش كنت في فيلاج ايام صغر كنحماق على افلام هندية خاصة الشعورات ديالهم فاش كيطيرو في الهوا ولكن كيزيدو فيها غير كيديرو ليهم فرفرة ههههههههههه وحنا كتبان لينا ريح كتطير في شعر هو ينطق الفتى الوسيم ... سلام عليكم وانا غير مصدومة وكنبرق في عنيه بديك زين لي فيها حتى بلبؤبؤ ديال عنيا ههههه هابط كيطل معاية وانا نقول وعليكم السلام نعام اخويا ... الفتى الوسيم ....كاينة الواليدة انا ... شكون واليدة ..... ؟ فتى الوسيم .... مولات دار وشكون انتي انا .. ا انت ولد خالتي امينة مرحبا بك دخل سمحليا معمرني شفتك غير كتهدر ليا عليك خالتي امينة ديما وكتوحشكم بزاف انت واختك سناء ..... الفتى الوسيم .... حتى انا توحشتها بزاف ولكن ظروف ولكن اختي انتي شكون انتيا مسبقليش شفتك انا ..... بديت كنتلعتم في هدرة معرفت باش نجاوب قلتلو خويا عمران كتبان ليا عيان سمحلي انا كنخمل ما سحابليش جاي اه نسيت ما قلت ليكم الشاب الوسيم اسمو عمران عمران ..... لا ماشي مشكل انا غادي ندخل لبيتي نرتاح الا جات الواليدة قولها انا في بيتي اش سماك الله بعدة انا ... ننننززززهة عمران ... مشرفين ولكن مالك خرجتيها بالقطارة هههه عنداكي تقلقي غير كنضحك وانا في خاطري كنقول كاع هاد زين واقف قبالتي وكملها قالك كيضحك معاية انا ... لا خد راحتك يتبع

جزء 9 : المهم جات خالتي امينة لقاتني ساليت شغال ودار كتشعل بقى ليا غير نحمر دجاج هههه ايه مشيت تقديت دجاج ودرت غديوا فاعلة تاركة وشلاظة ومونادا منين شفت عمران وانا فيا فيبرور ههه كان قلبي سيلونص ودبا ولى فيه نغمات وهزاز ههه يا سلام هذا حب من اول نظرة هههه الجمال حبو ربي خالتي امينة .. الله على ريحة عطاك الله الصحة ابنتي نزهة هادشي كيشهي ... انا بالصحة وراه عندي ليك مفجاة غادي تفرحك ...خالتي امينة شنو هي .. ولدك عمران ناعس في بيت وجا هادي شي ساعة هي طارت عليا عنقاتني ومشات انا وجدت طابلة ديال الغذا منوعة فاقوا جلسو جلست معاهم هو يشوف داكشي وهو يقول عمران ... واو هادشي كيجمق توحشت ماكلة ديال البلاد ودجاج محمر على حقو وطريقو الله يعطيك الصحة الواليدة هي تقوليه حاجة امينة ..... لا اوليدي نزهة لي وجدات كلشي اصلا انا بحرة جيت هو يشوف فيا عمران ... من ريحة وشوفة باين واعر الله يعطيك صحة ولكن راه الواليدة سولتها ومزال ما تعرفناش.. خالتي امينة .. ناكلو بعدة ونعاود ليك فعلا كلينا سالينا عمرت واحد مولاي براد اتاي عامر بالحب هههه ورومانسية والعطاء دخلتو البيت لقيت خالني امينة كتعاود ليه قصتي هي تعاود وانا نبكي عيشة دميعة بدات تاني ههه وهو يشوف فيا بحنان وانا نزيد نبكي بحال دري صغير الا حيدات لو مو البزولة ومزال ما شبع هههههه هو يقوليا ...عمران .. اختي نزهة عتبريني خوك ومرحبا بك معانا بركة راك مهلية في واليدة وانا نشوفيه قلت فخاطري اختي الله يخوي ليك جناب وضروس هه انا .. ربي يخليك اخويا عمران خرجت ديك خويا بزز مبتش نبين المهم من بين داكشي جا داني انا ومو سافر بينا فوجنا على قلبنا وتهلا فينا مزيان حسيت بالفرحة ونهار على نهار كنزيد نبغيه ولي زاد عجبني فيه مرضي بزاف يدخل يبوس على مو ويبقة يضحك معاها ولاحظت ما فيه حتى بلية ولكن كنتفكر فهادشي كنقول ناس دايرين فيا خير واكيد نهار يفكر يتزوج ياخد انسانة مثقفة وصغيرة في سن تناسب مع مستواه ثقافي وتكون انيقة ماشي بحالي انا كنلبس غير جلالب وكون غير شي جلالب راقيين داكشي سواقي وديما دايرة فولار ماشي حجاب غير كنجمع به راسي لا فزنقة لا فدار فوق راسي واخة انا زوينة وشعري طويل ورطب فاش كنت في فيلاج كنت ديما ندير وصفات حتى ولا شهوة منو وعمري قصيتو وملامحي زوينين واخة عندي 36 وقريبة نكمل 37 ولكن مع انا قصيرة ومغلضاش كنبان في عشرين واحد نهار فقت صباح لقيت خالتي امينة خرجات هي وعمران انا جمعت طيبت الغذا حتى تمو داخلين محملين كانو في مرجان ومعاهم واحد شابة وبنية صغيرة قالتي خالتي امينة بنتي الحادكة ها بنتي الاخرى سناء وبنيتها هي لي عطلتنا مشينا للمحطة قطار كنتسناو وتعطلات ....يتبع

جزء 10 : علينا موراها مشينا تقدينا من مرجان تسلمت انا وياها وبست لبنية دخلات هي وخالتي امينة وهو يقوليا عمران اختي نزهة انا اليوم عيد ميلادي وصحابي لي هنا والو قالو ليا ندير ليهم العراضة واخة غادي نمحنك معاية انتي والواليدة ولكن كيف كتعرفي راني قريب نرجع فحالي للخارج انا .. عيد ميلاد سعيد وعقبال 100 عام انشاء الله عمران ... بقى كيضحك هي على هاد الحساب مزال غادي نعيش 68 سنة انا ... اه انشاء الله وكثر وبيقينا كنضحكو حتى خرج عاد بحال الاسرفقتني يعني عمران عندو 32 سنة انا كبر منو قلبي تقبض من غير دوك عوائق جا حتى عامل السن صافي فقدت الامل وبقيت نبكي على زهري جات خالي امينة ... مالك ابنتي لا والو غير توحشت خوتي واخة انا توحشتهم ولكن ما نسيت شانهم كانو بغاو يزوجوني لواحد ولدو الكبير كبر مني واخة انا مصغراش صاوبتلو العشا ديال العراضة لي داير لصحابو لقاتني 6 ديال ساليت كلشي جا عمران شاف داكشي تبارك الله الله يخلي ليك صحيحتك ويدياتك انت مرا ديال زمان الواحد يعول عليك وميخافش سعدات هذا لي تكوني من نصيبو غادي تحمرلو وجهو حادكة وصواب وتاويل انا.. عنيا غررو قلتو ربي يخليك ودبا سمحلي راني عيانة غادي نرتاح شوية بدما جاو ضياف .. عمران ... ضياف ما غاديش يجو لهاد دار كلشي غادي يمشي للدارديالي كيف كتعرفي تماك كبير واليدة غير الله يهديها تمشي تسكن تما هبى كتقوليا منمشي نخلي داري كنشم ريحة الواليد لي بغيت نقولك صافي انت طيبتي كلشي غادي نديوه لدار تما وكاين لي يتكلف به دبا انتي تكلمي لاختي سناء مشيت عندها دخلت سناء ... تبارك الله على حادكة ساليتي علا سلامتك واخة مقلقة منك اختي مخليتني نعاونك انا .. لا اختي مالي اش درت داكشي مولفة به لي كان كيدير شي عراضة في فيلاج كان كيعيط ليا على راس وعين وزيدون انتي جيتي من سفر خصكي ترتاحي سناء... ربي يخليك احبيبة انا دبا بغيتك تمشي معاية دايرة موعيد مع واحد كوافورة ندور شوية بالحالة وبغيتك تمشي معاية حتى انتي دوري براسك شوية مالك على ديك شدة اختي تقول ساليتي وكملتي ...يتبع

جزء 11 : انا .. اختي لي عندها 37سنة راه كملات وسالت من دنيا سناء.. سيري لبسي جلالبتك وبركة من البهلان وهدرة خاوية وزيدي قدامي مشينا لواحد صالون كبير شهوة منو دخلناا تسالمات سناء مع مولات شي هي تقوليها ها بنت لي قلت ليك وانا ما فاهمة والو راك عارفة شنو ديرو ليها مشاو دخلوني لواحد بيت وفيه واحد بياص ههه بحال ديال طبيب وبقاو خدامين دارو ليا لا سير وجات من بعد غسلو ليا شعري وخدموه بشوار ووحدةةدارت ليا مانكير وانا غير معجبة جاني راسي بحال الا عروسة احساس عجبني بزااف منين كملو مني انا معرفت راسي اما سناء بقات حالة فيا فمها وكتقول تبارك الله ماشاء الله تبارك الله سناء ...فين كنتي مخبية هادشي وهاد شعر كلو وكنتي خازناه في داك زيف انا ... كنضحك وصافي حشمتني خلصات وخرجنا دبا باقي ليك غير شي لبسة وتولي واعرة انا ... هذا عيد ميلاد ديال عمران ..سناء ... ولكن كاينن ناس مهمين صحابو خصنا نكونو انيقات حتى احنا المهم عطاتني واحد كسوة لونها زرق ملكي وسميطات ديالها في الفضة سناء... يا اختي سبحان الله كيف كتباني كتحمقي اليوم دبري ليك في شي عريس ... انا .... الله يهديك اشمن عريس صافي مشا عليا الحال ... سناء زيدي زيدي قدامي بلا هدرة خاوية مشينا كيبانو ليا ناس قلال دخلنا لقينا خالتي امينة و2 صحاب عمران وسمية البنت لي كارية عند خالتي امينة وراجل سناء المهم خالتي امينة عرفاتني على هادشي هي تقوليا .. تبارك الله شفتك بعين رحمة ابنتي نزهة جيتي زوينة بزااف .. انا ربي يخليك اخالتي عويناتك وقلبك طيب لشافوني هكاك كاين فاش نعاون .. خالتي امينة لا اليوم غادي ترتاحي عمران جاب واحد جوج عيالات و2 سرباي باش يوجدو كلشي انا . واخة فين اخالتي عمران كاع ما بان ليا راه كاين لفوق في بيتو يالله كيلبس لله ابنتي نت هاكي خودي ليه تليفون كنت شاده ليه صدعني طلعيه ليه الفوق البيت التاني على ليمن انا .. واخة مشيت طالعة وقلبي كيضرب بجهد المهم وصلت دقيت حتى واحد محل كنعيط عمران عمران قلت واقيلة خرج نحط لو تليفون في بيتو ونزل دخلت يالله حطيت تليفون خارجة لقيتو كيسد الباب بساروت انا ... عمران مالك كتسد الباب بساروت ياك لباس وفين كنتي ...عمران .. كنت ورا الباب مخبي ههههه عمران ... وعلاش هادشي حل ليا خليني نخرج عمران لالالا مغاديش تخرجي من هنا انا واخة غادي نخرج واش شارب شي حاجة عمران.... سد ليا فمي وهو يقوليا هدرتي بزاف مالك فيك زربة بقيت كنقول اممممم مع داير ايديه على فمي عمران ...فراسك منين شفتك كان كيسابليا شي خدامة جابتها الواليدة ولكن منين عاودتيلي قصة حسيت بك بزاااف ومنين سافرنا كنشوفك كفاش كتصرفي بوعي ونضوج بالصح انت معندكش مستوى في دراسة ولكن قلبك بيض بزااف بديت كنحس بانجداب نحوك هو كيهدر وانا كنشوف فيه حيد يدو من على فمي وجرني جلسني على ناموسية وشد ليا ايديا .. عمران ... فيك جميع مواصفات ديال المراة لي كيحلم بها أي رجل مغربي متولة مصوابة وحادكة وطباخة ماهرة وغادي تكوني زوجة مطيعة وام حنونة .. واليوم في هاد ليلة تزادت نقطة مهمة وهو الجمال انا ... ومن هاد هدرة ديالك كاملة اعمران شنو المقصود .. عمران المقصود بغيتك تكوني شريكة حياتي وقلتها لواليدة عجبتها بزااف ورحبات بالفكرة وشكراتك ليا انا عرفت بنات بزااف ولكن زواج كيبغى مراة ديال الزمان لي تصون بيتها وتكون نعم زوجة وهادشي بان ليا فيك ... انا ... ولكن عمران فارق سن بيني وبينك 5 سنوات ماشي سهلة عمران ..الا نسيتي نفكرك اذا كان الرسول صلى الله عليه. وسلم تزوج السيدة خديجة رضي الله عنها عندما كان عمره 25 عاما وهي عمرها 40 عاما وزيدون كراي لي انا نقولك الا تزوج الرجل المراة اكبر منو كتكون حنينة عليه ومراة الا تزوجات شاب صغر منها كتحس بشبابها وصغرها ومتقوليش ليا مجتمع وداك تخربيق دبا منخرجو من هاد البيت حتى تجاوبني يتبع

جزء 12 : وانا محترم أي قرار خديتيه وكوني هانية سوا رفضتي او قبلتي مغادي تغير حتى حاجة انا ... محسيت براسي حيت بديت نبكي وجات على مسامعي جملة ولسوف يعطيك ربك فترضى شفت فيه وقلت ليه اه موافقة مسح ليا دموعي وعيط على اختو عاودات صاوباتلي مكياج وهي تقوليا الف مبروك اصلا هاد حفلة كانت منها عيد ميلاد خويا وحاب تكون حتى خطبة ديالكم الا وافقتي وربي مخيبوش فعلا درنا خطبة داك نهار وبعد يومين درنا عقد وحفلة صغيرة جمعنا فيها ناس مقربين عائلة راجلي وكنت كنتمى يكونو خوتي حاضرين ولكن معندي مندير راجلي رجع لخارج وبقيت عايشة مع خالتي امينة كيف الاول ولكن هاد مرة وافقت تحول لدار عمران وراجلي كيجي كل 3 شهور حتى دازت 3 سنوات وهبط فحالو بالصفة نهائية المغرب وولات عندي انا 40 سنة وراجلي 35 سنة ومرزقنيش الله بالولاد وراجل ي ديما كيصبر فيا وكنطلب الله مشيت عند طبيب قاليا حالتك صعيبة شوية الهرمونات قلال عندك وصعيب باش تولدي خاصة مع حتى عامل سن فقدت الامل وكنشوف راجلي بالصح معاية مزيان ولكن غادي يبغي يشوف ولادو لهذا خديت قرار انا ... عمران خالتي امينة انا عندي دبا 42 سنة وعمران 37 سنة ومعنديش الامل باش نقدر نحمل لهذا بغيت نقولك اخالتي امينة تزوجي عمران ..... عمران .... ومعامن تشاورتي شكيت عليك انا هكا مرتاج ولجات من عند الله مرحبا بها ومعمرني غادي نلقى شي مرا بحالك .... خالتي امينة سمحلي اولدي عمران انا ما بقى ليا في هاد الدنيا والو بغيت نشوف ولادك وبنتي نزهة عندها الحق في أي كلمة قالتها وغادي تبقى معززة مكرمة عمران.. صافي كلمة وحدة منبقاوش نزيدو في هادشي انا ... الا موافقتيش خصك طلقني عمران .. وقدرتي تقولي هاد كلمة بعد هاد العشرة .. انا ... غرغو عنيا بدموع وبديت نبكي وكنقولو انا مراة عاقرة وعاجزة اش غادي دير بيا .... عنقني عمران وبقى كيسكت فيا وخالتي امينة شافت موقف حتى هي زادت تبكي درنا جنازة من داك نهار ماجبدنا داك موضوع حتى واحد نهار كنطيب الغذا حتى حسيت بدوخة وطحت دخلات خالتي لقاتني في الارض تصلات ب راجلي جا دغية فيقوني قاليا والو تمشي عند طبيب لي خبرني انني حاملة ب 3 اسابيع فرحنا بزااف وراجلي دار صدقة ان الله على كل شيء قدير دازت ولادتي صعيبة ولدت بالفتيح ولي غادي تعجبو ليه ولد 3 توام 2 ولاد وبنت وكان ربي عوضني على سنوات لي تحرمت منها من ولاد ورزقني باكثر ما كنت اتمنى بدل طفل 3 اطفال لي سمتهم فضل ومحمد وامنية لي في عمر ديالهم دبا 21 سنة وعايشين بخير وعلى خير وحتى خوتي تصالحت معاهم وكنديرو ديما صلة الرحم وهادي حكاية نزهة مع العنوسة. 

النهاااااااااية