المقبرة

السلام عليكم الإسم ديالي يوسف السن 23 غي مريح فالدار حنت الواليدين عندي كيحساب ليهوم راني مسطي تبعو معانا لا بغيتو تعرفو قصتي كفاش بدات . هادشي بدا عام 2010 كان عندي الباك لي شديتو الحمد لله و لي مدوز الباك غادي عرف أن هاد العام كيعيا فيه بنادم بزاف و كيبغي يتسراح من إكمل و هادشي علاش فكرت ندير شي رحلة أنا و عشراني لا خوتي هههه أشرف و سيمو كنا معروفين بالتسطيا ديالنا و غاع الصائب درناها ب 3 و عشرتنا بدات من الطفولة الخلاصة كنا توام ولكن كل واحد من أم. كان عزيز علينا التخيام و الصفر و شنو أحسن مناسبة تقدر تجي حسن من هادي باش نصافرو ولكن حرنا فين غادي نمشيو حنت معدناش مع البلايص العامرة بحال المدن الكبار كنبغيو الغابات الجبال يعني البلايص لي معامرينش بكحل الرأس كل واحد و أش كقتارح ولكن فاللخر قررنا نخيمو فغابة معمورة ل حدا الرباط ، درابنا حسابنا شخال غادي خصنا ديال الفلوس داخلا فيها فلوس المازوط و القص ، معندناش مشكل فالطرونسبور حنت أشرف باه أيخليها ليه ههه شكون إقدر إقول لينا لا ههه ناجحين فالباك ، مهم كل واحد جاب حقو فالفلوس هبطنا تقدينا الخضرة العطرية اللحم غاع داكشي لي غادي إخصنا فهاد السيمانة خديناه و تافقنا باش الغد ليه أنتحركو بكري أشرف أيدوز عندنا إهزنا من ديورنا و داكشي لكان وصل الصباح لقيت مي مسكينة فايقة كتسنا فيا عنقاتني و قاتلية ردو البال لريوسكوم و قول لأشرف إصوغ بشوية قلتليها متخافيش أ ميمتي بست ليها على راسها و خرجت عندو و دزنا عند السيمو و هزيناه تا هو ، كانت شي 6 ديال الصباح ديك الساعة و راكوم عارفين العشران من كيتلاقاو شي شاد ف شي و بقينا كنخطو كفاش أندوزو هاد السيمانة و كل واحد و شنو قال و لكن ف الاخر تافقنا باش نحطو الطونوبيل فشي أوطيل من ليكيكونو تماك و حنا نهزو لي صاكادو ديالنا و نشوفو شي حد ولد المنطقة لي ورينا البلايص الزوينين فالغابة و نخيمو تماك إيه كلشي قبل ، خلينا أشرف كيصوغ و نعسنا حنا. من فقنا كنا تماك مع شي 8 و نص حينت بين الجديدة و الرباط ماشي بزاف ديال الطريق هبطنا فطرنا فواحد الكافي و من تماك مشينا للواحد البلاصة كيكون فيها المخيم ديا الدراري فالصيف صافي دوينا مع واحد السيد باش الطونوبيل تبقى تماك و وصينا العساس و هو نيت سولناه على شي حد إكون حافض الغابة مزيان ، قالينا واحد هو لي حافضها بحال صباع إديه سعد خدينا النمرة و عيطنا ليه ...



 و تافقنا باش إجي عندنا قدام المخيم ، دازت نص ساعة و هو يبان ولد صغير تكون عندو شي 25 باينة فيه ولد البادية غي من هدرتو. دوينا معاه تافقنا على التمان و بدينا ديك الساعة نيت الرحلة ديالنا رحلة موراها غيموت لي موت إنتاحر لي نتاحر و هادشي كلو سبابو الزعامة تبعو معانا.
أول نهار داز يا سلام الضحك و النشاط سعد بالزربة دار بلاصتو حنت ضحوكي و نكات ورآنا شي بلايص فالغابة قليل لعارفهوم شي بلايص ديال العومان ما واصلهومش كحل الراس الخلاصة نهار واعر بزااااااف، وصل الليل و قلنا أش غنديرو نقلبوها خلعة كل واحد إعاود شي حاجة كتخلع بقات النوبة دايرة تا وصلات عند سعد و هنا أتبدا القصة .
سعد :هادشي لي غادي نعاود ليكوم راه ماشي قصة أو حكاية هادشي بصح و شحال من واحد تسطا و هبل و نتاحر بسباب هادشي ، هادي قصة واحد المقبرة كاينة وسط الغابة لي كيقارب منها كتسطا حينت كشوف شي حوايج خايبين بزاف شي حوايج تا عقل ما يقد يصبر ليهوم و ناس لولين كقولو بلي ديك البلاصة مسكونة وكل عام و بضبط فشهر 7 كيتسيفو شي حوايج على شكل بنات زوينات بزاف و كيغريو الحطابة باش إتبعوهم ولي تبع الشهوة ديالو و مشا معاهوم كيديوه للقبارة و لي وصل تماك كيهبل و كيبقا تابعو داكشي تاكيموت أنا علمتكم دابا ردو بالكم مزياااااااااان
ههههههه أنا ضحكت عليه بزااااف حنت هادشي جاني بحال شي قصة ديال أفلام القدام بزاف معلينا نعسنا ، دازت السيمانا كلها هانيا غي الضحك و النشاط و الضحك حتى للنهار اللخر باقي عليه بحال اليوم كنا دايرين باش نمشيو لواحر البلاصة تماك ديال العومان كانت شي 4 ديك الساعة و هي تبدا الضبابة كطيح لدرجة أن لي حداك ما كيبانش ليك صافي مابقيت كنسمع تا صوت حدايا آه تودرت بقيت كنغوت سعد أو والو ماكاين حتى جاواب بقيت غادي بوحدي كنحاول نتبع الضو ديال الشمس لي بشوية بشوية بدا كغبر تماك عرفت بلي المغرب وصل و أنا مزال بوحدي ههه و ما غادي نتفكر غي القصة ديال المقبرة لي عاودها لينا سعد ولكن هاد المرة ما ضحكتش شداتني الخلعة ديال بصح و ريحت فبلاصتي حبدت موبايلي لقيت الريزو والو أميمتي أش هاد الحالة وحلة ديال بصح شوية .....
شوية كنحس بشي إيد حطات فوق كتفي ههه و مع القصة ديال المقبرة فراصي شداتني الخلعة ديال بصح كنتلفت كناقاها واحد البنت آية من الجمال و ديك الساعة كانت طاحت الضلمة قاتلي مالك عاودت ليها ليكاين قتليها را تودرت و تلفت على صحابي قاتلي و اش 3 دراري قتليها اه قاتلي راني دزت عليهوم فالطريق قاتلي يالله معايا نوريهم ليك أنا ديك اللحظة تفكرت الهدرة ديال سعد و بقييييت كانفكر نمشي ولا لا و فاللخر غادي ناخود القرار لي غادي يغير حياتي 180 درجة متصوفتش هدرت سعد و مشيت معاها فيما كنحاول نشوف فرجليها مكنقدرش بقينا غادين واحد العشرة ديال الدقايق تا وصلنا لواحد الخلا و هي تبدا تقرب مني بشوية بشوية و كتغول لي بغيتك صراحة الفورما عندها واعرة و مقديتش نشد راصي و تبعت الشهوة ديالي و مارست معاها من سالينا كنت عيت بزاف تكيت و جات تكات على الصدر ديالي و قاتلي بلي وليت ديالها دابا أنا بديت كنغيب بشوية بشوية صافي من بعد غي السكات و الضلمة من فقت كان الصباح و لقيت راصي فالمقبرة و ناعس حدا قبر أول مرة كنحس بالخلعة فحياتي . قشعت الباب و بديت كنجري فحال لهبيل تا وصلت ليه و تخيلو شكون لقيت أشرف و سيمو فوجهم باينة الخلعة تا هوما طرا ليهوم نفس ألبلان تافقنا منعاودو ل سعد والو و تمشينا واحد تولوت ساعة ، جبدت ألو لقيت الريزو و عيطت لسعد عطيتو الأوصاف ديال البلاصة ليحنا فيها و مع هو حافض الغابة مزيان عرفنا فين و جا عندنا. صدق الليل كامل و هو كقلب علينا و مالقاناش و كان غادي مشي عند البوليس ولكن عيطنا لهيه سولنا كفاش تاتلاقينا و قلنا ليه غي بالصدفة و حنا الله عالم بينا صافي قالينا سعيد واش ليوم هو اللخر قلت ليه آه صافي قصدنا المخيم فين حاطين الطونوبيل خلصنا العساس توادعنا مع سعد و خدنا النمرة ديالو و شدينا الطريق و لكن هاد المرة ماكاين لا ضحك لا ناشطا غي السكات من الرباط تال الجديدة من وصلنا كل واحد حطو أشرف حدا دارهوم و مشا هو للدار ...


من وصلت للدار كانت شي العشرة ديك الساعة لقيت الدار مزال كفطرو،سلمت عليهوم قالو لي أجي تفطر قلت ليهوم بصحا و مشيت أنا ندوش دخلت طلقت السخون و ترخييييت حنت كنت عيان بزاف مهم ساليت مشيت قدام لمرايا باش نمشط شعري ولكن وجهي ماكيبانش فيها ناري والو ماكنبانش خرجت كنجري عند الدار كان الواليد خرج ديك الساعة ميمتي مسكينة كتقوليا مالك و أنا كلمة وحدة ليكاينا ففومي وجهي ما كاينش فالمراية و كنغوت و هي مسكينة كتعنق وتصبر فيا راك غير تخيلتي إمكن قلت ليها اللا أجي تشوفي راه والو ماكانبانش و هي دايرة ليا خاطري و مشات معايا و بان وجهي قاتليا شتي راك غي تخيلتي قاتلي سير توضا وصلي أولدي ونيت صليت ورتاحيت شوية ولكن هاد يومين أدوز صعيبة بزاف كل ليلة كنبات نحلم شي أحلام خيبة بزاف و من كنوض كنلقا راصي مقبوش من إيدي و رجلي و وليت كنلبس الطويل فعز الصيف باش الواليدة متشوفش داكشي . الوقت مابقيتش كتحس بيه شي وقت كيحساب ليا راحنا مزال ف 2008 تا بنادم كرهتو وليت إنطوائي بزااااف و الدار لاحظو هادشي ولكن الغالب الله راه ماشي لخاطري و أنا نتفكر الدراري عيطت ليهوم و قلت ليهوم نتجمعو فالقهيوة المعلومة صافي هبطت باش نمشي عندهم لبست و بديت غادي و أنا ندوز من واحد الدريبة خاوية معروفة بالكريساج ههه ولات فيا الزعامة بزاف ، ليكيت فودني و غادي و هوما يوقفو عليا واحد الجوج واحد فيهوم دوا و قاليا جبد ليعاندك بلا غوات و صداع متمزكتش ليه و حدرت راصي و تميت غادي و هو يشد ليا من كتفي و قاليا تصحب راصك صحيح من غندور عندو و نشوف فيه بدا كغوت و بدا كيجري غي بوحدو صاحبو شاف داك المنضر و دار فيها صحيح يلاه غادي بغي يضربني بالموس و هو تخبط مع الحيط غي بوحدو و غيب إنا غي شفت داك المنضر و عطيتها للجري وخا خرجت من ديك الدريبة بقيت كنجري بحال الهبيل و بنادم حاضيني تا وصلت للقهوة لكحان بالعطش قلت للسرباي شي شريبة أحمباك مسكين جاب ليا الما و قال ليا را عشرانك الفوق كعرافنا حنت إيام البريباراصيون كنا ديما هنا مهم طلعت عاد الدراري

وصلت عاد الدراري كنلهت و سولوني مالك عاودت ليهوم لي كاين صدقو تا هوما ولاو كيطراو ليهوم شي حوايج أنورمال المهم بدينا كنقلبو على الحل و حنا نتفكرو سعد آه عندنا النمرة ديالو و ديك الساعة عيطنا ليه
أنا:ألو سعد 
سعد:وي أميغو توحشتكم و الله
أنا:حتى حنا المهم بغيناك داروري واش تقدر تجي عندنا للجديدة
سعد:ياكما كاين باس وي نقدر ولكن تال السيمانة الجاية حنت ختي دايرة العرس و باغي نحضر معاهوم
أنا:صافي وخة المهم من تبغي تجي علمني باش نجيبك من المحطة بسلامة
سعد :بسلامة
صافي قطعت معاه و تافقت أنا و الدراري باللي غادي إجيو عندي للدار باش نبقاو مجموعين بيما لقينا شي حل ولكن خصنا شي سبة نقولوها للدار مهم ديورهوم كانو مصافرين و كانت هادي هي السبة قلت ليهوم صافي دابا باي من نعيط ليكوم أجيو عندي و داك شي لي كان مشيت للدار و قلتها للواليدة وافقات حنت أشرف و سيمو أصلن ماشي شي وحدين غراب راحنا كبرنا بتلاتة المهم عيطت ليهوم و قتليهوم دوزو عندي، مشات الواليدة قادت لينا الدار الفوق و قاتليا راحنا أنصافرو واحد السيمانا عند خالتك قلت ليها أوك غدا مع الصباح غادي نمشيو و رودو البال . صافي جاو عندي الدراري و طلعنا الفوق،كانحاولو نساو هادشي لولينا عيشينو. خدمنا البلاي و بقينا مقصرين أنا مكنعرفش نلعب مزيان بردوني ههههه مشيت شعلت البيسي وحليت الفايس و بقيت مكونيكتي و هو يوصلني واحد الميساج فيه الموت ستلحق كل من دخل أراضينا فاللول كحساب لي غي شي واحد مطلعها و لكن ملي كنبغي ندخل لكاتب لي الميساج كيتبلوكا البيسي و كيطفا ناري الخلعة شداتني و ما قلت للدراري والو صافي مخرجناش هاد الليلة و الواليدة طلعات لينا العشا قصينا و نعسنا، فقت مع اليل باش نبول حاشاكوم غي قربت للحمام لقيتو مسدود والضو شاعل كنتلفت كنلقا الدراي بجوج ناعسين شوية تحل الباب ديال الحمام و أنا مزال كنفكر واش ندخل و لا مندخلش و فالأخر قررت ندخل للمجهول ...

درت واحد الحاجة ل أي واحد إقدر إعتابرها زعامة زايدة مهم دخلت و إدا بيا كنلقى واحد المنضر شعر ديال إيدي وقف مش مقطع ليه راصو حدا الباب و الغنازة ديالو معلقة الوسط و مكتوب ب الدم فالحيط الموت قادمة أنا غي شفت داك المنضر صافي تبلوكيت شحال من فكرة جاتني فبالي ولي غادي سالي معايا هو الإيد لتحطت على كتفي كنتلفت باش نشوف وياريتني ما درتها كنلقا غي الشعر و الوجه ما باينش قاتلي أنا مرتك الجديدة أنا من سمعت هاد الجملة صافي غيبت و غنفيق غنلقا راصي فبلاصتي أواه هادشي غي حلم الله على راحة نضت كنجري للحمام مالقيت والو زدت تيقنت بلي هادشي غي حلم ولكن من بديت كنغسل كنشوف إيدي كنلقاها فيها شي حاجة صفرة كنحاول نغسلها والو فيقت الدراري بالزربا قالو لي هاديك راها حنا و يمكن راك تجوجتي بجنية غوت جنيييييييية ناري قفارت أنا هبطت عند الواليدا لقيتهم صافرو معرفت ماندير تلفت واش أنا كنت ناوي النشط و نضحك وليت فهاد الحالة صافي وليت كنفكر ننتاحر و مشيت عند المون و بديت كنفكر نلوح راصي ولكن مقدرتش تفكرت بلي راه حرام و عذاب لهيه كتر من عداب هنامن بعد مشيت لواحد الكوان و بديت كنبكي ديال بصح مهم شي 2 سوايع و أنا تماك جبدت ألو شعلتو كنلقا الميساجات ديال الدراري و المكالمات صايفطت ل أشرف ميساج قتليه أنا جاي و مشيت عند واحد مول المسمن جاني واحد الجوع ديال بصح ههه كلشي نصبر ليه إلا الجوع قصيت مزيان و رجعت عند الدراري لقيتهوم مخلوعين بالمزيان، هاد السيمانة دازت صعيبة كل نهار غي كودن المغرب كنعيشو الرعب فالدار ولينا كنشوفو داك شي بعينينا مريحين و الدوش خدام مريحين و الطبلة كتحرك قدامنا مريحين التلفازة كتطفا و تشعل الخلاصة الرعب ديال بصح وصل نهار الحد و هو يعيط ليا سعد باش نمشي نجيبو من المحطة مشينا عندو غي شفتو و تلاحيت عنقتو حنت علمنا باش منغلطوش و غلاطنا هبطنا للدار و عاودنا ليه قالينا واحد لي قدر إعاونا واحد الفقيه فالشياضمة حدى الصويرة أنا فديك الحالة يقول ليا يلاه للمريخ نمشيو تافقنا باش الصباح نتحركو بكري ...

خرجنا الصباح بكري مع 5 باش نوصلو تماك و نلقاو الدنية خاوية و نقديو غاراضنا بكري و داكشي لكان كنا تماك مع العشرة ديال الصباح، غي الجبال و الخلا لي كاين و كل دار بعيدة على ختها بمسافة صراحة مرتاحيتش لهاد البلاصة بزاف معلينا حطينا الطونوبيل حدى دار ولد خالت سعد الصراحة ستقبلنا مزيان وخا ناس على قد الحال ولكن لي كاينة يحطوها ليك ، إوا خرج معانا سمير ل هو ولد خالت سعد وبقينا شادينمعاه الهدرة صدق إجازة فالأدب الإنغليزي إييييييه ولكن الخدمة والو خدام غي عند واحد مول الهري كفرت على هاد الوضعية و نسيت حالتي أنا . المهم الطريق كاملة و حنا داوين تا وصلنا عند دار السيد لضاربين الطريق على ودو ، دار صغيرة و مبنية غي بالطين كتخلع الواحد غي من الشوفة. دخلنا شدينا النوبا مع العيالات (حضيو راسكوم ) من وصلت نوبتنا قصادنا البيت لي مريح فيه أش غادي نقوليكوم الدخاخن ديال بصح ريحت البخور كتخنق و المجامر دايرين . مع غدين نبغيو ندخلو غادي يدير واحد الشوفة ديال الخلعة بحالا إلا تصدم قال لينا بركو هي هاديك قالينا شنو كاين عاودنا ليه البلان كامل و محدنا حنا كنهدرو و هو كلمة وحدة لي على فومو مزيان مزيان من كملنا قلنا ليه شنو الحل صدمنا و قاليا خصنا نرجعو من بدا هادشي ناري الغابة تاني بقيت ساكت و شفت في الدراري و بان ليا فالوجه ديالهوم الرعب ولكن هادا هو الحل لكان عندنا قلنا ليه واخا ولكن أتصبرو عليا يوماين عاد غادي نمشيو صافي مشات إو و خرجنا من عندو مزال عند الباب عيطات ميمتي ألو يوسف واش نتا لاباس كنت باغي نقوليها لا أميمتي را ولدك قريب أهبل و لا ينتاحر جي را تقدري تلقايني في القبر ولكن ما قدرتش قلت ليها أه الحمد لله و نتي قالت ليا اللا حاسا بشي حاجة غتوقع و قلبي مزير عليا هه قلت ليها غي جاب ليك الله يالله تهلاي فراسك و ماديري فبالك والو أوا و قطعت ، صافي داز هاد النهار مريان و لكن النهار التاني و بالخصوص فالليل أيكون نهار إستتنائي ....

داز النهار اللول هاني الحمد لله نعسنا مزيان ولكن النهار التاني أيكون صعيب بزاف مريحين فواحد البيت فدار سعد كان مزال الضهر هاديك الساعة و أنا نسمع صوت البكا ديال شي بنت تلفت عند الدراري و لقيتهوم تاهوما مشوكين قلت ليهوم كتسمعو قالو أه ولكن الدار مافيها تا دري صغير و أقرب دار بعيدة ب نص ساعة يعني مايمكنش تسمعو حتى لا كان. نيت بالزربا مشا هاد الصوت هاد المرة صافي نسينا جابو لينا نتغداو ومن بعد خرجنا مع سمير نبدلو الجو شوية واخا كاين الحجر ولكن حسن من والو حاس براصي مخنوق و نفسي مضيقة ولكن بانو ليا الدراري نشطو شوية ومبغيتش نخصر ليهوم المورال، النهار غادي مزيان تال هنا وصل الليل و رجعنا عيانين غي وصلنا و تلاحينا باش الصباح نودو بكري و نشدو الطريق ، صافي طفينا الضو غمدت عيني و نعست وغنفيق على صوت البكا تاني ولكن هاد المرة بوحدي كنشوف جيهت الباب بانت ليا بنت صغيرة لابسا البيض كنسمع صوت البكاديالها و بدات كتجري و أنا تابعها بدون شعور معرفتش كيفاش تا تبعتها إمكن كنت مغيب أ مهم تابعها وصط الخلا و الحجر تا بعدت على الدار مزيان و هي توقف و أنا نتم جاي عندها قلت ليها شكون نتي مجاوباتنيش بدات بشوية بشوية كتقرب ليا و السيفة كتبدل ولات ختنا لي شفت فالغابة قالتلي هانا فرزتك دابا مدات ليا إيدها و قاتلي يلاه معايا و كلشي أيكون كيف كتمنا حتى أنا مديت ليها إيدي و بديت غادي ولكن شحال من حاجة طاحت فبالي صحابي قرايتي ميمتي و أنا نوقف قاتلي مالك قتليها ما يمكنش هادشي لوقع خطأ و صافي أنا إنس و نتي جن هادشي حرام مع قلت حرام تبدلات الصيفة الزوينة و ولات السيفة الخيبة نخليكوم تخيلوها بوحدكم وهي تقوليا الموت أنكويك فالغالي عليك و نتا أتبقا حي و غنحرق ليك خاطرك كيما حرقتي ليا خاطري من بعد ضرب ليا الضو ف عيني و بحالا عميت من غادي يرجع ليا الشوف غنلقى راصي وصط الطريق أنشوف جيهت ليمن أيبان لي كاميو جاي قبالتي ...

غنشوف جيهت ليمن أنلقا كاميو ما بقا بينو و بينو غي شي دقيقة مع الصدمة ما عرفت نجري ولا نتسنا الدقة هه هادي اللخرة ليا واش هادي هي الموت لقاتليا ختنا إمكن صافي وصلات ساعتي غمدت عيني و بديت كنشاهد و أنا نسمع صوت مغريبش عليا يوسسسسف عندااااك و هزني وحسيت براصي تخبطت موراها غي الضلمة و سكات ههه إحساب لي راصي مت ولكن جا الصباح لقيت راصي فالبيت و جنبي ليمن عاطيني الصداع لقيت حدايا السيمو سولتو على أشرف قالي واش ما عاقل على والو أنا بديت كنعاود ليه على الحلمة قالي داكشي ماشي حلمة راه بصح لبارح فالليل كنتي كتجري وحنى سمعناك من فقتي و تبعناك ونتا بحال شي هبيل وسط الجبل و مشيتي للطريق و بغيتي تموت وقفتي قدام كاميو و كون ما أشرف كوراك دابا كفتا و سولتو على أشرف قالي راه تفدع من إيدو و مشا عند شي مرة تجبرها ليه تسنيت تا جا و مشيت عنقتو راه ماشي ساهل ترمي نفسك للموت على قبل عشيرك صافي كان البروكرام هو نهزو الفقيه و نقصدو الغابة عوتاني ، توادعنا مع سمير صاراحة تهلا فينا و مخالا تا حاجة ناقصانا هاد المدة،إو و سعد هو لي غادي صوك بينا حنت بجوجنا معطوبين و سيمو ما عندوش البيرمي دزنا هزينا الفقيه و شدينا الطريق أنا باقا هدرت ختنا فودني واش نيت تقدر ديرها و تقتل لغالي و العزيز عليا و شكون بالضبط هادو أسئلة بزاف دارو براصي ولكن معندهومش جواب ، و الوقت هو لي غادي يجاوب عليهوم ، نعست و درتها ف يد الله من وصلنا فايقوني هنا كان خصني نعرف داك الفقيه علاش ناوي من سولتو على شنو ناوي بدا كيخرج و يدخل في الهدرة خاطري ما رتاحتش ليه ولكن كان هو أمالنا الأخير إوا وصلنا الغابة هو كان جايب معاه شي خنيشة معرفنا أش فيها ، هو بدا غادي بينا وسط الغابة بحال إلا حافضها ماشي بحال ألى حافضها راه نيت حافضها بدا غادي بينا تا وصلنا للمقبرة ...

وصلنا للماقبارة و جرني سعد قاليا هاد خونا رامارتاحيتش ليه كفاش لي حافض الدنيا هنا حسن مني و كيفاش مطلب لا فلوس لا والو مهم أنا را مامرتاحش ليه قلت تا أنا المهم نتبعو الكداب تال باب الدار ، مشيت عندو قتليه شنو البروجرام قاليا صبر تال المغرب و غنبداو إوا الوقت كامل و أنا بالي مشغول و تا واحد ما كيدوي مع لاخر وصل العاصر و هو ينوض قالينا أنبداو دابا باش ملي ودن المغرب إلقانا خدامين قتليه فاش شافيا قاليا لا بغيتي نحل ليكوم المشكل خدم و سكت عارف راصو ولد الحرام بلي منقدر نقول ليه والو يعني لوا ليا إيدي مشا الخنشة لي جاب معاه و جبد واحد الصندوقة و جبد منها واحد العصا و تلاتة ديال البالات (كحفرو بيهوم) عطانا شي قراعي قالينا خويو عليكم هادشي كنحل القرعة كنلقا داكشي حمر بقيت كنشوف فيه قتليه شنو هادا قاليا دم الحلوف غي سمعتها و أنا نشنق عليه قتليه واش تسطيتي ليوم غادي نحر دين مك و الدراري شاديني قاليا را هادا هو الحل ليكاين لا مبغيتييش صافي نجمعو قلوعنا و نمشيو شدِيت القرعة و فلتها عليا و حمرت فالدراري عينيا صافي تاهوما خواو عليهوم هاداكشي أنا تخلطو عندي الأحاسيس النداما مع الكره لداك خونا مكرهتش ندبح مو هنا نيت ، رايحنا الوصط وهو بذا كرسم واحد الدائرة و ديك الدائرة وسط دائرة بقا غادي تا وصل 3 و هو يجبد واحد الحنش و عيط ليا نود بالزربة قبل ماي أدن المغرب أنا كنقول هاد الزمر شنو باغي تاني عطاني الموس و الحنش و قال ليا دبح هادا و الدم رسم بيه فوق هاد الخطوطة خطفت ليه داكشي من إدو و قتليه أرا تشوف و جريت للحنش راصو تا بدا الدم كيرش و أنا بالزربة درت داكشي ليقاليا و رجعت عند الدراري لي شادهوم الرعب ديال بصح غي أدن المغرب و هو بدا كيقرا فالقرآن و لاح ليا اللعيبات باش نحفرو ومعاهوم ميكة سالا المغرب و هي تبدا الضبابة و الغوت و كبانو لينا الخيالات قدامنا مبقيناش كنشوفو سعد و الفقيه غي الخيلات قدامنا و صوت الدياب حدانا أنا حليت الميكة و هنا فين كانت الصدمة لقيت فيها إد ديال بنادم و موس و جوج وراق وحدة فيها أش خصنا نديرو خصني ندير الموس ف الإد و نكتب داكشي ل في الورقة فالأرض و نبداو نحفرو ناري من شديت ديك الإيد زاد الغوت ديال الدياب و من بديت كنكتب دوك الخيالات كوصلو تال عدنا و كيروجعو نخلي ليكوم المنضر نتوما التخيلوه بذينا الحفير و الصداع كتزاد شوية ...

من بدينا الحفير داكشي صافي ولا كوصل تال عندنا و يحبس مورا واحد 30 دقيقة ديال الحفير وصلنا لواحد الصندوق من جبدناه حسينا بالتبوريشة وسمعنا واحد الغوتة خيبة بزاف موراها صافي الكااااااالم أواه صافي سالينا زعما من بعد غي سكات و بشوية بشوية بدينا كنغيبو من وراها صافي غي الضلمة أه غيبنا من غنفيقو أناقاقاو راسنا مليوحين فنفس البلاصة و سعد تا هو مغيب ولكن الفقيه الفقيه فيناهو أه دا داكشي لي جبدنا و هرب مشينا نجريو عند سعد حينت سايل ليه الدم من راصو مهم بقينا حداه تا فاق و قلنا ليه عاود لينا البلان داك التامل الشك ديالي كان فماحالو من طاحت الضبابة غبر على سعد و ضربو لراسو باش إغيب كان مخطط لهادشي من اللول هو باش إجبد الخزنة مكانش إقدر بوحدو كان خصو شي واحد مسكون وهو فبلاصة واحد لقا 3 هادشي علاش مدوا لا علا فلوس لا على والو حنت داكشي لجبدو ساوي الملاين و كون قالها لينا كان إحساب ليه غاد نبغيو حقنا خدمنا ولد الحرام ولكن بلاتي زعما نكونو تفكينا من هاداكشي ما كاين لا موت لا والو حنت كنحس براصي مخفف بزاف ولكن حالتنا غاع دم خصنا نغسلو ، مشينا حنا و سعد لواحد البلاصة ديال العومان تشلبطنا مزيان غسلنا حالتنا و مشا هو يجيب لينا مانلبسو من دوارهوم إوا و شدينا طريق الجديدة عوتاني توادعنا مع سعد و قلنا ليه هادشي بيناتنا خاص تحد مايسيق الخبار أنا كان فاتني الصداع دونك أنا لي أنصوك إوا هي هديك وصلنا للجديدة ووهمنا راصنا بلي راه فاتنا داكشي و داز الصيف كان كلشي رجع للطبيعة ديالو تال نهار عيط ليا سعد وقاليا بلي عيط ليه سمير و قاليه بلي داك الفقيه لقاوه مدبوح وسط دارو أواه يعني هادشي مزال ماكمل

ههه كنا كنحسابو بلي سالينا من هاد القصة و النهاية كملات زوينة ولكن كنا غالطين الفقيه لقاوه مدبوح فدارو و هو مادارش هادشي بوحدو حنا شاركنا ولو بطريقا غير مباشرة يعني نوبتنا،جايا جمعت الدراري فالقهيوة و قلت ليهوم بلي الفقيه لقاوه ميت و ملقاوش لي قاتلو و إحتمال مليكونش مات طبيعي يعني بسباب داكشي ليجبدنا الدراري تصدمو وبانت الخلعة فوجهم أه من حقهوم هادشي خياب بزاف وصيتهم بلي لا بدات شي حاجة أنورمال كطرا إعيطو ليا باش نلقاو حل لهادشي إوا صافي كانت بدات القرايا أنا كنت دافع الصونتر و بديت كنمشي و آندمجت فالجو ديال القرايا و احد النهار كنت خارج تال 6 و جيت عيان بزاف غي جيت و تلاحيت نعست و أنا نحلم بأشرف قالي راني مصافر تهلا فالواليدة أنا فقت كلي عرق عيطت ليه مع السبعة قلت ليه واش نتا صافا قالي عادي الحمد لله قلت ليه رد البال لراسك أصاحبي أوك هو ما فهم والو صافي و قطعت نهار كلو و أنا مرفوع حاس بشي حاجة غادا تطرا كنت قاري غي الصباح و العشية خاوية تغديت و نعست و أنا نسمع الدقان فالباب لقيتهوم الدراري حليت عليهوم مشقلب قالو ليا جري صاحبك راه نتااااااحر أشرف مات مااااااااااات شناوا مشيت لقيت الدنية مرونة البوليس و الصطافيط ناري أشرف مات خويا مات فلحضة رجع شريط داكشي لدوزناه من كنا صغار مشيت عند مو عنقتها و بقيت كنبكي و فديك اللحضة جا السيمو تا هو وصلاتو الخبار غسلناه ولكن ما صلاوش عليه حنت مات منتاحر هادشي لحساب ليهوم ، صافي غادين باش ندفنوه و أنا نتفكر نهار لاح راصو قدام الكاميو قدامي و بديت كنبكي تاني، وصلنا حدا قبرو دفناه و تسنيت تا مشا كلشي و عنقت تراب لفوق القبر و بديت كنبكي بزااااااااف و السيمو ورايا تا هو كنسمع صوت النحيط ديالو صافي جرني و قال ليا بلي خصنا نمشيو نعاونوهم فالعشا صافي ترجلت و مشينا عاوناهوم ، سالا كلشي و أنا نطلع لبيتو فيما ندور نلقى تصويرة ديالنا أترات فيا موتو بزاف .
مشات أيام و جات إيام و مزال منسينا أشرف و فشهر 11 واحد النهار كنت تاني قاري غي فالصباح و العشية والو مشيت للدار لوليت مكنخرجش منها دخلت تغديت و نعست تاني ، فيقني صوت التيليفون ألو يوسف أنا السيمو هادشي فات القياس بسلامة و قطع خرجت بشورطي كنجري للباطيمة ديالهوم كنشوف فالسطح كنلقاه غدي يتلاح و بنادم مجموع معقلتش كفاش تا وصلت عندو حاولت نقنعو ولكن ماشي السيمو هاداك لدوا معايا دوا معايا واحد الصوت مغريبش علية قاتليا عقلتي ياك قتليك را غادي نكويك فالغالي عليك هاوا التاني أنقوتلو تاني قتليها صاف بعدي منو مشكلتك معايا أنا قاتلية فات الفوت و تلاح السيمو و تاهو مات .
و أنا مرضت و ليت كنغوت بوحدي فالدار و بقيت بلا قرايا بلا والو و تا واليدية عياو معايا مخالاو طالب ما خالاو طبيب و لكن الغالب الله. قاتلي غنكويك و كواتتي فأعز ما كان عندي .
النهاية