لعنة العقد – ذاكرة روح بدون جسد -

البارت 1

فقت فالصباح كيف ديما ناشطة و فرحانة عندي حياة زوينة تمناها أي بنت كنت كنملك جمال رباني و عندي أسرة كتبغيني و موفرة ليا كلشي و مخطوبة بواحد الشاب من خيرة الشباب الزين و العقلية نزلت باش نفطر كلشي موجود : صباح الخير يا أحلى أم فالعالم ـ صباح النور بنتي مجدولين الغزالة كيف صبحات الأميرة ديالي ـ الحمد لله مانقصني والو غير توحشت بابا ـ مابقا ليه والو و يجي الأب ديالي كيخدم فواحد الشركة ديال البترول فالخليج و كيجي مرة فالعام كانت هاذي هي الحاجة الوحيدة اللي ناقصة فحياتي غياب الأب هاذ الصباح ماما كانت مشغولة بزاف : شفتك بحال إلى شاغلاك شي حاجة ـ لا يا حبيبة بالعكس أنا اليوم فرحانة ـ و فرحينا معك ـ اليوم غنرجعو لدارنا راه تصلحات أوااه من بعد 5 سنين عاد كملو الإصلاحات ماعقلاش على هاذ الدار كيما ماعقلاش على طفولتي ماعاقلة على حتى حاجة قبل نهار 15 سبتمر 2010 هاذ التاريخ اللي حليت فيه عيني لقيت راسي فالسبيطار صفحة بيضاء بنت بلا ذاكرة : صباح الخير ـ صباح النور فين أنا ـ نتي فالسبيطار ـ علاش ـ تعرضتي لحادث و عائلتك راها برا كتسناك تفيقي ـ شكون أنا مكنعرف حتى واحد ـ سمعيني أبنتي هادشي اللي غنقوليك عارفو صعيب و لكن غادي تجاوزيه نتي تعرضت لإصابة فالرأس و فقدتي الذاكرة و لكن بمساعدة الأسرة ديالك غتقدري ترجعيها جزء بجزء إن شاء الله هادشي اللي قاليا الطبيب ذاك النهار و من هنا بدات حياتي و مغامرات اكتشاف الذات العائلة كتوريني التصاور و الأشرطة المصورة على الله نعقل على شي حاجة ووالو بقا ماتفكرت حتى حاجة ولكن بديت كنولف العيشة معاهم من جديد علاش اللي لقى بحال هاذ الأجواء مايولفش و مايتأقلمش و اليوم غنرجعو لدارنا اللي من مورا الحادثة نتاقلنا نعيشو هنا و أنا على أمل منين نرجع للمكان اللي تربيت و كبرت فيه لقى راس الخيط باش نعقل على تفاصيل حياتي لأنه رغم هاذ الحياة اللي عايشاها صعيب تعيش بلا ماضي على الأقل تعرف راسك غير شكون نتا و كيفاش كنتي ماشي مجرد ذكريات كيعاودوها ليك الناس فحديثهم أو أحداث كتشوفهوم فالصور و الأشرطة دخلات ماما و حاملة معاها واحد الفستان زوين فالأزرق السماوي متناسق تماما مع لون عينيا كنت شقراء و شديدة البياض كنشبه لماما اللي من أصل أوروبي : شوفي شنو جبت ليك ـ زوين عجبني بزاف يخليك ليا يا أحلى أم ويتك على عوينات شحال غزالين و لكن شنو المناسبة ـ عائلة خطيبك عارضين علينا للعشاء غنمشيو نتعشو و من تما نشدو الطريق لدارنا حينت غنوليو جيران فرحت بزاف منين الدار اللي غنسكون فيها قريبة من دار خطيبي اللي كثر من عام و حنا مخطوبين قالو ليا باللي من الصغر و حنا كان بغيو بعضياتنا طبعا أنا هادشي ماعقلاش عليه و لأني تعرضت لإصابة فالرأس ماشي فالقلب دغيا بغيتو من جديد لبست الفستان و مابقيتش بزاف كنشوف
فالمرايا مامحتاجاش ليها أصلا ركبت فالطوموبيل باش نمشيو للحفلة اللي مخصصة على شرفنا .

وصلنا لدار أهل محسن خطيبي و كلشي مستقبلنا و فرحان كانو الأهل ديالو كيبغيوني بزاف الحفلة بدات و أنا بقيت كنشوف فهاذ الدار الرائعة رغم الحداثة إلا أنها كانت دار من الطراز القديم التقليدي كانت بعيدة شوية من صخب المدينة فمنطقة ريفية ضواحي العاصمة الرباط كتمتاز بالطبيعة الخلابة كنت كنرتاح فيها و كناخذ راحتي بحال فدارنا و صلت لبيت محسن فيا الفضول نشوفو ما فيها باس هذا بيت خطيبي دخلت واو كلشي مرتب و فبلاصتو بان ليا واحد الألبوم هزيتو كنشوف تصاوري أنا و هو من طفولتنا حتى لخطوبة كانت كل صورة كتحمل ذكرى و كاتب عليها Petit Mot للأسف أنا ما عقلاش على هادشي كامل كنقرا غير Note اللي حاط كنحاول نتذكر أي شيء و لكن عقلي خاني كل اللي كنتذكرو غير الأحداث من 15 سبتمر 2010 الفوق و أنا خارجة تلفت للكوافوز كنلقا عقد محطوط شكلو غريب و كان بسيط عكس كل العقود اللي كتملكها هاذ العائلة اللي كانت كلها ثمينة و مصنوعة غير بالأحجار الكريمة كان هاذ العقد بحال شي خيط خياطة عادي و فيه 9 حجرات عادية بحال شي بويضة حاولت نحلهوم مابغاوش تساءلت مع راسي كيفاش ممكن يجيني إلا لبستو وقفت قدام المرايا و حطيتو على عنقي مجرد مالبستو حسيت بالحكة عادي عندي جلد high class إلا ماكنش ذهب الحر 24 قيراط مانلبسش عندي حساسية بغيت نحيدو مابغاش بقا لاصقني بحال شي عقد من حديد : غير خليه جاك زوين كنتلفت كنلقاه محسن اللي دخل و كان كيضحك و فرحان بوجودي : ولكن قنطني ـ غادي تولفيه ـ صافي واخا سخسخني غنخليه على قبلك بقينا جالسين و كنضحكو وواخا العقد كان بحال إلا خانقني ستحملتو على ود محسن كنقلب على ماما قالتلي الأم ديال محسن باللي جاتها شي ظروف و مشات و خلات ليا العنوان ديال الدار باش نرجع تعجبت ماما ما كتخلينيش بوحدي و اليوم لأول مرة غنشدو الطريق لدارنا مشات و خلاتني أكيد جاها ظرف طار ئ ،خذيت العنوان سالات الحفلة مع ذيك 08:30 ديال الليل و مع الصيف و الساعة الجديدة كان باقي الحال باقي حتى المغرب ما أذن خرجت من الفيلا و أنا نفسي مقبوضة و ماعندي خاطر منين لبست هاذ العقد بحال إلا حاطة جبل على عنقي ماشي عقد خفيف مكاملش فيع 50 جرام بقيت كنتمشى فالفيلا و ماعرفتش علاش حسيت بالخوف موالفة نمشي و نسافر بوحدي و لكن اليوم كان مختالف بدا كيجيب ليا الله بحال شي واحد مراقبني و كيتبعني زربت فالمشية ماكانتش عندي الشجاعة نشوف موريا بغيت نحل الطوموبيل لقيتها محلولة و أنا متأكدة سديتها قبل ماندخل و غير أنا اللي عندي السوارت قلت مع راسي سبحان اللي مايسهى مع اشتياقي لمحسن نسيت ماسديتهاش ركبت بغيت نصاوب المرايا الأمامية بان ليا شي واحد جالس اللور كان طيف لابس الكحل و كتبان غير عينيه اللي حمراء سديت عيني زعمت و درت مالقيت حد بقيت كنقول مع راسي غير مع الخلعة بديت كنتخايل صبرت راسي بهاذ جوج كلمات و ديماريت غادا و مخلوعة بديت ضربات قلبي كتزاد ريقي نشف كنحس بحال شي واحد كيتنفس فالطوموبيل كنت كنسمع الصوت مزيان بدات يدي كترجف قريب نوصل للدار شوية الطوموبيل سكتات ماعرفتش مالها هبطت نشوف واش شي رويدة و لا شي حاجة كلشي كان مزيان و الخزان باقي فيه البنزين ماعرفتش مالها زعمة تكون الطوموبيل شينوا كتبان ليا الدار مابقاش ليها بزاف قلت نزيد على راجلي بقيت غادا الطريق خاوية العجب فين الناس كانو بزاف ديال الديور و حس بنادم ماكيدور و لكن كنسمع الأصوات و سمية كتردد فوذني " وئام " كنتلفت ماكنلقى حد بدا الرعب كيتسلل للداخل ديالي رجلي مابقاوش قادرين يهزوني رغم الصيف و الحرارة كنسمع صوت ريح و الشجر و الرعد و الشتا مع أني ماكنحسش بالبرد و الشجر ماكاينش شوية واحد الطوموبيل كتشبه لديالي كانت غضربني مع الضواو ماقدرتش نشوف شكون سايق رجعت باللور و تبطأت السرعة و دازت السيارة من قدامي كانت سيارتي ماكان كيسوقها حتى واحد غادا بوحدها بقيت مصدومة حبسات الطوموبيل قبالتي و سمعت صوت قبلة طايرة فالهوا و عاودت سمعت سمية " وئام " 

كنت غنتشلل ذيك الساعة كنسمع كلاكسون ديال الطوموبيل مابغيتش نتلفت شوية كنسمع سميتي : عرفت الصوت كان صوت ماما عاد رجعات فيا الروح درت و مشيت كنجري عندها شافتني و تخلعات : مالك يا بنتي ـ ماما ماغديش ثيقي شنو شفت أنا براسي مامتيقاش بقات ماما كضحك و ضحك مافهمت والو : يا بنتي كنعيا معك ماتبقاش تفرجي فذوك أفلام الرعب هانتي غير شفتي الدنيا خاوية بديتي كتخايلي ـ لا يا ماما هادشي ماكانش خيال أنا متأكدة من هادشي كان بصح ـ وزيدي ندخلو دابا و رتاحي راك غير عيانة دخلنا للدار اللي لأول مرة غنشوفها فحياتي رغم أنها كانت جميلة و عصرية حسيت بالخوف منين دخلت ليها شفت الساعة لقيتها 01:30 ديال الصباح و التاريخ 15 سبتمبر 2010 : أش هاذ التواريخ شافت ماما فالساعة : خوينا الدار فهاذ التاريخ و فهاذ الساعة بالضبط ـ علاش ؟ ـ درتي الحادثة يا بنتي راك ماعقلاش دخلي دابا رتاحي فبيتك بديت طالعة مع الدروج و إحساس أن شي واحد تابعني مابغاش يفارقني مرة مرة كنتلفت غير كندور كيتقطع الحس درت نكمل طريقي بان لي بحاال شي شبح ولا روح مشات بسرعة فائقة هادشي كامل تهيئات لا أساس لها من الصحة ماما عندها الحق بقوة مكنتفرج فأفلام الرعب بديت كنعتاقد باللي هادشي كاين دخلت للبيت اللي غنعس فبه و اللي فالأصل كان بيتي غير حليت الباب بديت كنكتاشف المكان كان فيه سرير و ماريو و حمام بقيت كنشوف فيه و كان فيه واحد الصندوق بغيت نحلو كان مسدود بالساروت و فيه قفل محفور عليه حرف W شفت Calendrier لقيت 15 سبتمر 2010 هاذ التاريخ غير كنلقاه صلحت التاريخ و درت تاريخ اليوم الساعة حتى هي فيها 01:30 نفس الساعة اللي شفت قبيلة ريكلتها دخلت للحمام كان يوم صعيب بقيت حانية راسي و كنفكر فهادشي اللي وقع ليا اليوم كان صعيب طلقت الصنبور غسلت وجهي بالما مزيان هزيت فوطة مسحتو شفت فالمرايا تفزعت و رجعت باللور عرفتي شنوهوا تشوف فالمرايا و تلقى وجه ماشي ديالك رجعت ثاني و شفت فيها و أنا كنعتاقد غير تخايل ليا كنلقى نفس الوجه ديال قبيلة هربت و مشيت كنجري : ماااا ...... ما ـ مالك يابنتي رجوع لله ـ شششفففت المممممر ... الللمراااايييا مممماشي أنا مممماششششي وووجهي بقيت كنبكي و نغوث جاتني حالة هيستيرية ماما تخلعات عليا و بقات كتبكي معايا تاصلات بواحد الطبيب نفساني جا عطاني مهدئ و نعست ماحسيت بوالو الدوا بحال إلا بنجني بديت كنسمع البيبان كيتزدحو و بحال ريحة ديال الحريق تخلعت و فقت كنلقى البيبان و الشراجم كيتزدحو و الأصوات ديال البكا و الغواث فالغرفة و اسم وئام كيتردد درت نشوف الساعة لقيتها 01:30 و تاريخ اليوم 15 سبتمر 2010 بقيت فبلاصتي كنحاول نفهم أش واقع قدامي الزجاج بدا كيتهرس و الغواث عاد ماكيزيد و ريحة كتزيد لدرجة أنها خنقاتني شعري وقف بالخلعة لحمي تبورش كنحس بحال شي ناس معايا فالغرفة و كيهربو و كيجريو ماكانتش الرؤيا واضحة شوية بدا كلشي كينقص الريحة و الأصوات و كنسمع صوت واحد بوضوح : وئام وئام اليوم انتقام ليك كلشي تصقل منين تسمع هاذ الصوت شوية تطلقات صرخة قوية بغيت نهرب ساعة كنشوف يد خرجات من تحت السرير شداتني من رجلي بغيت نتخلص منها ولكن حكماتني بقات كتجرني و أنا كنقاوم لدرجة أن أثار الظفران حفرتهوم فالأرض الخشبية كلشي حبس ورجع كيف كان و كلشي تهدن كنلقى الساعة 02:05 وتاريخ حتى هو رجع ديال اليوم

كندور فكل جانب من الغرفة كلشي مرتب حتى اليد اللي ختارقات السرير مابانش الأثر الزجاج رجع كيف كان أثار الأظافر مابقاوش فالأرض واش هذا حلم حاجة وحدة غتبث باللي هادشي ماكانش حلم أثر اليد فرجلي ناري هادشي بصح ماكانش حلم بقيت جالسة فالصالون و مهمومة و غير على سبة و خاصني معامن دخلات ماما شافتني جات كتجري : ماجدولين مالك ـ ماما حيدي منك هاذ القاعدة واش داخلة للزربية بصباطك كنت شاعلة و غير كنغوث : واش حنا دابا فالزربية شوفي حالتك كيدايرا ـ ماما شي حاجة ماشي حتى لهيه ماما الدار مسكونة واقيلة ـ أويلي على مسكونة رجوع لله ـ ماما داكشي اللي شفت البارح ماكيدخلش للعقل ـ كون راه غير شي كابوس ـ لا يا ماما لا حتى هاذ الأثر كابوس شافت ماما رجلي و تصدمات بقات غير ساكتة : هادشي مكيدخولش للعقل بدا تيليفونها كيصوني مشات تجاوب و أنا بقيت كنفكر غير فأحداث البارح هزيت مرايا حسبت حتى ل 3 و شفت لا هاذي أنا ماجدولين ماشي البنت اللي شفتها فمرايا الحمام البارح و شكون هاذ وئام خرجت شوية نشوف هاذ المنطقة واش مساكن حد شحال ديال الديور و ماشفت حتى واحد حتى بانت ليا واحد البنت قالت سلام و دخلات لواحد الدار لاباس بعدا كاين السكان بقيت واقفة شحال هزيت الطوموبيل بغيت ندخل نعلم ماما باللي غنمشي وصلت حدا بيتها كنشم بحال ريحة ديال شي جيفة تخلعت مشيت كنجري بغيت نحل البيت لقيتو مسدود كندق : ماما ماما مكتجاوبش بقيت كنبكي و كنعيط عليها و هي والو حتى دازت مدة عاد حلات الباب : مالكي ـ ماما خلعتيني عليك مالكي مكتجاوبيش ـ كنت كندوش شفت فيها من الفوق حتى التحت : كدوشي ؟ و مالك لابسة هاذ الحوايج واش الصباط حتى فالبيت ـ هههه لقيتيني خارجة و نتي اللي ضربك ضربك على صباطي داير ليك عقدة ـ حينت غير مخشية فيه ـ نقية بزاف إلى توسخات الدنيا نجيبو لي ينظفوها كوني هانية ماغتقيسيش الماء ـ ياك أودي غير على ود هاذ العوينات مانتقلقش منك بقينا كنضحكو علمتيها باللي خارجة خذيت السيارة و توجهت للمكتبة الوطنية بديت كنقلب على الكتوبة المتعلقة بالأوراح و عالم ما وراء الطبيعة لقيت بزاف ديال الكتب فعلم الميتافيزيقيا و لكن لفتني واحد العنوان "الخروج من الجسد " مالقيتش فيه داكشي اللي بغيت كان كيهضر على الأمر بمنظور فلسفي و أنا كنت باغا منظور روحاني جلسات حدايا واحد البنت تكون عندها شي 8 سنين : الخروج من الجسد جاب ليا الله بحال إلى مهتمة بعلم الأرواح تفاجئت كيفاش بنت فهاذ السن عارفة هاذ الأمور و لكن أنا اللي باقا قديمة : لا مامهتامش بهادشي غير حب استطلاع ثقافة عامة و صافي ـ إلى بغيتي نعاونك مافيها باس درت كنشوفها هزا كتاب بلا عنوان و لكن فيه مجموعة ديال التجارب حية من جلسات استحضار الأرواح : شنو سمية ديال هاذ الكتاب ـ لا هذا ماشي كتاب هذا مجموعة ديال القصص و كيفية استحضار الروح وهي عبارة عن مجموعة من المقالات الصحفية مجموعة فهاذ الكتاب ـ ممكن تخليه عندي ـ خوذيه كاع مابقيتش محتاجاه ـ علاش ؟ ـ حينت مابقات ليه حتى فائدة بالنسبة ليا خلات الكتاب و خرجات بقيت تابعاها بعيني وقفات فباب المكتبة كانت الشمس قوية بقيت متفاجئة رغم أنها واقفة و ضاربة فيها الشمس ماكانش عندها ظل فالأرض 

مابقيت كنعطي حتى شي تفسير لهادشي اللي كيوقع ليا عايشة أحداث أغرب من الخيال بقيت كنقرا فذاك الكتاب و تجارب الناس و كيفية الاتصال بالروح و تسخيرها مكنتش مصدقة هادشي اللي كنقرا كيفاش ممكن للإنسان من بعد الموت يعيش حياة أخرى أو كيما كيسميوها العالم الآخر و يتاصل و يتواصل معانا ولكن من خلال قراءاتي استنجت أن وئام بنت اللي روحها معذبة و بغات تنتاقم و لكن شنو هي قصتها وقصة هاذ الدار و هاذ التاريخ بالضبط عرفت باللي وئام هي البنت اللي شفتها فالمرايا ديال الحمام فكرت حتى أنا ندير جلسة تحضير الأرواح و نتواصل مع وئام و نعرفها شكون و كيفاش ماتت و علاش بغات تنتاقم وعلاش هاذ الناس بغاو يعاونوها نضت من المكتبة غنرجع للدار و نحاول نقلب على أي تفسير ركبت الأوطو و بقيت غادية خدمت GPS باش نعرف الطريق مايمكنش GPS مكيطلعش ليا العنوان بحال إلى ماعرفوش بقيت كنشوف و متفاجئة حتى كنت غندير كسيدة و نضرب شي واحد بدلت الطريق بسرعة ووقفت هبطت من الطوموبيل كنت غنضرب قطة تنفست حينت كنت مرعوبة لا نكون غنضرب شي حد بقات القطة كتشوف فيا و مع أنا كيحمقوني مشيت هزيتها بقيت كنعنكشها وهي بقات غير كتشوف قلت عادي القطط معروفين بهاذ النظرات و لكن الأمر استمر بزاف بدات كتخلعني شوفاتها و ماكانوش عينيها غراب عليا مكنتش متوقعة غادي تهجم عليا بقيت كنغوث و هي كتقمشني و تضربني بغيت نحيدها و هي كانت لاصقة و أنا كنقاومها هرست ليها يديها هربات و مشات كتجري و حتى أنا رجعت بالزربة لسيارتي بقيت كنصاوب شعري و حالتي درت يدي على عنقي كنلقى ذاك العقد مزال لابساه بغيت نحيدو حينت منين لبستو تبدلات حياتي ما بغاش يتحيد درت كنشوف فالمكان حولي كنت حدا مقبرة بانو ليا شي عيالات لابسين البيض ووجهوم ماكيبانش هازين كصعة ديال الكسكس و متوجهين لشي قبر بداو كيحفرو و أنا حسيت بالخوف بلاصتهوم جبدو الميت و هزو يديه دوزوها على الكسكس بقيت كندقق فواحد المرأة مزيان ملامحها كانت مؤلوفة واخا كلها مغطية يلاه بديت نحقق فيها شي حد كيقجني و بدا كيخنقني من الكرسي الخلفي بديت كنغوث و نبكي كتبان ليا يد كلها زركة تلفت نشوف كانت بنت مكيبانش ملامحها كلها مدركة بشعرها كيبان غير فمها و كتردد " وئام " بقيت كنقاومها حتى داز العيالات و هي تختافا بقيت كنكحب حينت تخنقت بغيت نسوق و نبعد من هنا بانت ليا البنت ديال قبيلة واقفة فالطريق و كتحرك راسها و كضحك بقيت غير غادا بعدت حتى تضربت مع واحد الشجرة البكا الخلعة الحيرة كلشي تجمع عليا بقيت كنحس بروحي غادي تطلع بقيت شحال فالسيارة حتى كنسمع الدقان فالزجاج قفزت درت لقيت واحد السيد كبير فالسن : ياك لاباس يابنتي مالكي درتي كسيدة ـ اه يا عمي ـ شنو وقع عرفت باللي إلا عاودت ليه ماغاديش يتيقني داكشي علاش كذبت عليه : أنا Acmastique و شداتني la crise ـ صعيب يا بنتي فين Vontoline ـ نسيتو ـ علاش يابنتي اللي مريض بهاذ المرض كيخرج بلا بيه 2 حوايج يابنتي الماء و الرشاشة ديالك مغسهومش يفارقوك جبد Vontoline وعطاني ضربت بيه أصلا هذا غير أوكسجين عادي ماعندو مايدير ليا و أنا نيت كنت مخنوقة ركبت معاه فالشاحنة باش يوصلني حينت مابقيتش قادرة نركب فالسيارة مرة أخرى

كان مخدم واحد الكاسيط ديال القرءان حسيت بارتياح بقيت ساكتة : فين ساكنة يابنتي مديت ليه العنوان و بقا كيشوف فيه شحال : منين عقلت على راسي و أنا فالطرقان عمري سمعت بهاذ العنوان بقيت مستغربة لا Google Maps عرفو ولا حتى محترفين الطريق أنا فين ساكنة : راه كاين فالخرجة ديال الرباط نتا غير وصلني تما و أنا غنكمل بقا كيشوف مزيان و كيتحقق من العنوان : واش ماشي هاذ الدار اللي كانت مسدودة بسبب الحريق ـ الحريق ؟ لا أنا ماعرفتش هي فعلا كانت مسدودة و لكن غير على قبل شي إصلاحات ـ ماعرفتش يا بنتي أنا كنعرف غير الدار اللي تحرقات و العنوان جاني هو ـ شنو قصة ذيك الدار ـ قصتها غريبة هذيك الدار كان ساكن فيها عائلة صغيرة الواليدين و بنتهم كانو معزولين على الناس و منين تحرقات الدار حتى شي واحد مابقا عارف عليهوم شي حاجة واش ميتين و لا حيين حينت مالقاو حتى شي جثة و لا شي سبب للحريق و تغلقات القضية ضد مجهول بقيت كنفكر فكلامو خاصة من بعد ريحة الحريق اللي شميتها البارح و بغيت نتأكد من حاجة وحدة الأسماء : شنو سمية ديال ذيك العائلة ـ الأم كلثوم و الأب سمحمد و البنت وئام صافي هنا تبثات ليا الرؤية وئام هذا هو الإسم اللي كنت كنقلب عليه ولكن علاش قالو ليا باللي هاذي دارنا شي سر مور هادشي لغز ولابد ماخاصني نحلو وصلت للحومة شكرت السيد بزاف بقيت كنشوف فالدار من بعيد شنو حكايتها أكيد كاينة شي حاجة : سلام كنتلفت كنلقى البنت اللي سلمات عليا فالصباح جارتي الجديدة فرحت بزاف حينت غنتمكن من تعارف على ناس هنا و نزيد نفهم أكثر حول الموضوع : سلام ـ نتي جارة جديدة ـ نعم نتي ساكنة هنا ـ غير هنا حداكم دخلي تشربي معايا شي حاجة مابقيتش كنخاف دخلت معاها للدار مشات للكوزينة تصاوب أتاي و أنا بقيت جالسة فالصالون بقيت كنشوف فواحد التصويرة كانت هي وواحد البنت اللي وجهها ولا عندي مألوف و اللي كنسميها ببنت مرايا الحمام الغريب أنها كانت كتلبس نفس العقد اللي أنا لابساه غير هو ناقص بحجرة كان فيه غير 8 ديال الحجرات : صاحبتي تلفت نشوف كانت جايا و هازا معاها صينية ديال أتاي هاذي صاحبتي ـ شنو سميتها ـ وئام ـ كتشوفيها ـ 5 سنين دابا ماتلاقيناش و لكن مزال غنتلاقاو جلسي تشربي معايا أتاي جلست خوات 2 كيسان عطاتني واحد و خذات واحد بقينا كنهضرو فبزاف ديال الأمور وماجبدناش حس الدار نضت بغيت نخرج سلمت عليها كنتلفت للكاس ديالها ديال أتاي باقي كيما هو و الغريب أنها كانت دايرة غلوز لفمها و ماكاين حتى شي أثر لشفايفها فالكاس لا أنا متأكدة باللي هي كانت كتشرب تلفت نشوفها مابانتش ليا بقيت كنعيط والو ماكاينش اللي كيجاوبني دخلت كنقلب عليها مالقيتهاش ماعرفتش منين جاتني ذيك الشجاعة و بديت كندخل بيت ببيت و أنا هدفي غير نلقاها مايمكنش تكون خرجات و ماعندها علاش تهرب مني بقيت كنقلب و نعيط حتى وصلت لآخر بيت فهاذ الدار دخلت والو ماكيناش لقيت واحد البطاقة هزيتها فيها تصويرتها و كانو فيها المعلومات ديالها الإسم : نهال تاريخ الإزدياد : 12 أكتوبر 1989 و هنا تصدمت صدمة كبيرة منين قريت هاذ المعلومة تاريخ الوفاة : 14 سبتمبر 2010

كيفاش تاريخ الوفاة أنا عاد هضرت معاها خرجت من دار و مشيت لدارنا و لا بغيت نقول لدار وئام و أنا متأكدة باللي هاذ البنت بغات تنتاقم و هاذ الناس كاملين اللي بانو ليا بغاو ينتاقمو معاها و السبب مور هادشي اللي كيوقع ليا هو هاذ العقد عقد ديال وئام اللي لابساه و لكن وئام كان عندها غير 8 ديال الحجرات منين تزادت هاذ الحجرة وعلاش حنا ساكنين فهاذ الدار و قالو ليا باللي دارنا فين واليديها أما هي فكنت عارفاها محبوسة فذيك المرايا ديال الحمام دخلت كنتفاجئ بحليمة مامات محسن جايا عندنا و جايبة معاها شي ناس : بنتي فين كنتي ؟ ـ خالتي غير مشيت خرجت شوية ـ مافيها باس جلسي تغداي هاذو ضيافنا ناس أغنياء و إن شاء الله غنتناسبو ـ فين ماما ـ فبيتها عيانة شوية مشيت نشوف ماما دخلت كانت جالسة غير شافتني و هي تغطا : تعلمي دقي عاد دخلي قالتها بغضب : ماما راه قالتليا خالتي باللي عيانة ـ شوية ماما ماكان عندها خاطر مابانش ليا فيها مريضة شديتها من يديها : وصافي نوضي من التبوحيد نوض تغداي بقات كتغوث : يدي ضريتيني كنت متأكدة باللي مازيرتش عليها بزاف و هي بقات كتألم منين شديت ليها يديها و جسمها كامل مغطي تحت المانطة أول مرة كنحس بالخوف و عدم الأمان معاها مابقيت فاهمة حتى حاجة مشيت للحمام ديال بيتي شفت فالمرايا و هي تبان ليا وئام : شكون نتيا ماجاوبتنيش كان اللي كنديرو كدير نفس الحركات كأنني فعلا كنشوف إنعكاسي فالمرآت غير الصورة اللي ماشي بحال بحال نزلت نتغدا كيبان ليا شي عيالات وواحدة عقلت عليها كانت مع النساء اللي مشاو للمقبرة و حفرو القبر بقيت فشكوك حتى تحط الغذا كانو دايرين كسكس و لكن ماكانش كسكس عادي كنت عارفاه كسكس بيد الميت دخلو الضياف كان أب و أم وولدهوم استقبلتهم حليمة و بنتها أحسن استقبال بقاو جالسين و كلشي مشغول بغيت نمشي لنقطة البداية المكان اللي لقيت فيه العقد حينت بيه غنفهم أمور كثيرة أهمها كيفاش وصل العقد لذيك الدار خرجت هزيت عيني للفوق كتبان ليا نهال كطل و حاضياني من الشرجم زعمت و عاودت دخلت للدار بقيت كنقلب عليها ماكايناش : نهال أنا عارفاك هنا خرجي نهضرو كنسمع الباب تسد مشيت بغيت نحلو مابغاش : نهال ماغنهربش بغيت غير نفهم أمور كثيرة عاونيني شفت باب واحد البيت تحل دخلت كنلقاها جالسة فواحد الكنبة و كتفرج فواحد الشريط كان عيد ميلاد بقيت كنشوف فذاك العيد ميلاد كيحتافلو بشي وحدة شكون هاذي البنت الصغيرة ديال المكتبة : نهال شكون هاذي ـ ختي ـ فين هي ؟ ـ ماتت ـ حتى نتي ميتة ـ ماشي غير أنا شوفي شكون غيقطع الكاطو بقيت كنشوف فالشريط بقيت مصدومة من ذاك الشي اللي شفت كنت أنا اللي كنقطع الحلوة و كتعنقني ذيك البنت : كتعرفوني ـ لا أنا كنعرف ماجدولين صاحبتي ـ و أنا ـ نتي ماشي ماجدولين جبدات واحد الورقة و عطاتها ليا بديت كنقرا فيها قريت السمية : ماجدولين رودريغيز الجنسية : إسبانية تاريخ الإزدياد : 28 فبراير 1990 و تاريخ الوفاة : 13 سبتمبر 2010.

التواريخ متقاربة ل 15 سبتمبر 2010 التاريخ اللي تغير فيه كلشي بقيت حايرة و مافاهمة والو القضية غامضة و معقدة و كلشي متداخل فيها : إلى أنا ماشي ماجدولين شكون أنا نهال كتهضر بحال شي صنم ماكتحركش و حتى من عينيها ماكترمشهومش : ماعرفتش أنا مكنعرف حتى حاجة مور 14 سبتمبر 2010 تاريخ وفاتي ماعارفاش شنو وقع من بعد ـ و لكن أكيد عارفة شنو وقع قبل ـ ماشي بزاف وئام هي اللي كانت عارفة كلشي ـ غير اللي عرفتي أي حاجة أي معلومة واخا تجيك تافهة ـ أنا و وئام كنا صحابات و مجدولين كانت يهودية مغربية و من أصل إسباني حتى هي كانت صاحبتنا و حليمة كانت كتسكن فهاذ الدار اللي حداكم و هي كانت رافضة علاقة ولدها بمجدولين و لكن كانت باغا الفلوس ديالها كانو من أسرة غنية بزاف ووئام كانت كتبغي محسن و عزيزة على حليمة هادشي اللي كنعرف و هادشي كيبان عادي و لكن أنا كنت متأكدة باللي حليمة كدير الشعوذة و ماعرفتش من بعد شنو طرا اللي متأكدة منو هو مور وفاة ماجدولين بنهار أي قبل وفاتي بساعات قليلة سمعتهوم غيديرو طقوس السحر الأسود و طقوس النكروماسي من أجل أشياء أنا مكنعرف عليها والو هادشي اللي عارفة بقيت كنسمع كل كلمة كتقول تأكدت باللي حليمة هي ساحرة و مشعوذة : كيفاش متي نتي و ختك ـ كلها و طريقتو فالسحر و لكن كيتشاركو فحاجة وحدة استحضار الأرواح و مساعدتها و تسخيرها فالعمليات ديالهوم و تقديم قربان ليهم باش يوطدو العلاقة معاهم و يبينو ليهوم أنهم على استعداد يديرو أي حاجة باش يثيقو فيهم و يكونو عبيد ليهم و ختي كانت زهرية و بغاوها من أجل التنقيب على الكنوز و ماتت 6 شهور قبل مني ـ و علاش أنا عايشة هادشي كامل ـ ماعرفتش و لكن يمكن يكون للأمر علاقة بعقد وئام ـ شنو كاين فهاذ العقد ـ وئام ماكانت كتخبي عليا والو ولكن هاد الموضوع بالضبط عمرها ذكراتو ليا داكشي علاش سبق ليا و ذكرت باللي وئام كتعرف حسن مني ـ وشكون سبب وفاتكم ـ حليمة و المساعدين ديالها ـ شكون هوما ـ ماكانوش من الإنس كانت امرأة وراجلها من الجن وهوما اللي كانو يساعدوها راسي داخ كلشي تشبك تفكرت القطة اللي هرستها فيديها و عينيها و تفكرت ماما اللي دابا هي مفدوعة من نفس اليد لا مايمكنش نكون هاذ المدة كاملة عايشة مع جنية خرجت من الدار و توجهت لدار حليمة كانت خاوية كلشي عندنا فالدار أكيد هاذ الضيف شي ضحية جديد و بغاو منو شي حاجة دخلت كنقلب على أي حاجة هزيت بعدا ألبوم الصور بين ماجدولين و محسن و خذيت واحد الكتاب بان ليا تما مابغيتش نبقا نقلب بزاف حينت خفت لا نحصل خرجت بزربة ركبت سيارة و أنا كنفكر غير فهاذ اللغز شكون أنا كيفاش ماتت ماجدولين و وئام أش وقع ليها بقيت غادا بالسيارة حتى وقفات عليا واحد البنت بغيت نتجاوزها و لكن بقات لاصفة : الله يعطيك الستر ياختي عتقيني ـ مالك ـ تابعيني عفاك ماتخليهومش يلقاوني بقات فيا خاصة أنني وليت كنطيح فمواقف مشابهة ليها ركبات و بقات كتشكر فيا : شنو سميتك ؟ ـ آية ـ فين كتسكني ـ غير زيدي حتى نوصلو و نقوليك بقيت كنتمشى وهي تفاجئني بهضرتها : باغا تعرفي الحقيقة وقفت السيارة و شفت فيها هاذي باش عرفات : كيفاش عرفتي ـ ماشي مهم و لكن اللي بغيت نقوليك ماعمرك تقدري توصلي للحقيقة ـ علاش ؟ ـ حينت نتي مراقبة و أي تحرك كيعرفوه داخل ذيك الدار ـ كيفاش غندير حتى نعرف الحقيقة ـ بلاصة وحدة ماكيوصلوش ليها ـ فين كاينة هاذ البلاصة ـ الأحلام ـ الأحلام ؟ ـ أه الأحلام و كاينة طريقة وحدة اللي كيتلاقا فيها الحلم و الحياة الإسقاط النجمي 

الإسقاط النجمي ؟ ـ تماما خاصك تحرري جسمك أثناء النوم تبعي الخطوات فالعالم النجمي غتقدري تعيشي الواقع و الأحلام و تعيشي الحلم و تشوفي أحداث واقعية ـ صافي فهمت دابا خاصني نوصلك ـ أنا وصلت للدار هبطات من السيارة و توجهات للمقبرة و شوية اختفت علاش كنشوف الموتى شكون هاذ البنت مابينت والو وصلت للدار و دخلت كنقلب على الإسقاط النجمي و طريقتو فهمت باللي الإسقاط النجمي هو حالة الوعي أثناء النوم أي أن غير الجسد اللي كيكون نائم أما العقل ففحالة يقظة تامة و يمكن لينا الاستيقاظ داخل الحلم آية عندها الحق بهاذ الطريقة أن غنتمكن من فهم بزاف ديال الحوايج بديت كنقلب على الطريقة ديالو باش نتعلمها فرحت ماكيحتاش لشي أمور صعيبة ولا معقدة الأمر كيتعلق بالأحلام أي أنني خاصني نتدرب على الأحلام نحلم و نعقل على أحلامي أي أنني فحالة وعي أثناء الحلم نعس عادي بحال أي نوم نفيق ونسجل الحلم نكتبو فشي ورقة باش مانساه و فالحياة اليومية من الحين للآخر نتذكرو و ندير هاذ الخطوات حتى نوصل لليوم العاشر يعني تقريبا حلمت 10 ديال الأحلام مور هاذ 10 أيام غنحلم حلم آخر و لكن هاذ المرة غاصني نسجلو فدماغي هاذ الخطوات كاملة باش غير نتمكن من التمييز أنني كنحلم لحظة الحلم لأنني غنحتاج لهاذ الإدراك أثناء الإسقاط النجمي هادشي كامل غير تمهيد للإسقاط النجمي أما الخطوات ديالو فكتبدا كأي يوم عادي غنمشي نعس فالليل نضبط réveil في وقت معين باش نقدر نفيق منين ضربني الفيقة ندير أي نشاط كيما كان و من بعد نرجع ننعس هاذ الخطوة هدفها أن عقلي يكون فحالة وعي تام بينما جسدي متعب باش نكون واعي فالإسقاط النجمي من بعد نرخي جسمي و نتفكر أي حاجة غير أنني غنقوم بالإسقاط النجمي حينت غنحطم كلشي نتسنى 10 دقائق من بعد غنحس براسي بحال إلى مخدر و غتبدا العملية حفطت الخطوات قررت نرجع حياة طبيعية و نتصرف عادي حتى نفهم السر السر اللي مخبي بديت كل نهار كنحلم و كنعقل على حلمي و كنسجلو خويت راسي من أي حاجة حتى نفهم و نشوف بعيني أش واقع عاد نبدا بالبحث عن الحقيقة صعيب عليا نعيش مع ماما و أنا ماعارفاهاش واش من الإنس ولا من الجن واش هي بعدا ماما أصلا ولا شي وحدة أخرى مرة مرة كنطل من الشرجم كنلقا نهال كتشوف فيا أحداث ذيك الليلة المشئومة بدات كتكرر كل نهار كنسمع صوت البيبان كيتزدحو و رائحة الحريق و الأصوات و اسم وئام كتبدا الأمور مع 01:30 و كتسالي مع 02:05 ولكن كلشي ولا كيجيني عادي حلمت 10 ديال الأحلام عقلت عليهوم كاملين كل واحد و المدة اللي كيستغرقها باش يقوم بهاذ العملية على حساب التركيز و القدرة ديال كل شخص كاين اللي ف 10 أيام كاين اللي شهر و حينت أنا كانت قدرة تركيزي عالية و ماستغرقتش بزاف باش نقوم بيه عاقلة على أحلامي اليوم حلمت الحلمة و عقلت عليها فدماغي و غدا غنقوم بالإسقاط النجمي

تعشيت عادي تمنيت لماما أمسية سعيدة و مشيت ننعس درت التيليفون مع 03:30 باش نفيق مع 03:30 فقت من النعاس شفت شوية فالشرجم الليل و كلشي ناعس و الغريب أن اليوم ماوقعوش الأحداث اللي موالفة توقع كأنهم كيتسناو نمشي عندهم بديت كنحس بالنعاس تكيت و ترخيت و كيف ذكرو فالخطوات بديت كنفكر فأي حاجة إلا أنني غنقوم بالإسقاط النجمي دازت 10 دقايق بديت كنحس براسي بحال إلا مبنجة و بدات مرحلة شلل النوم و بديت كنحس بضربات قوية فالقلب لدرجة ماعمر قلبي ضرب بهاذ الطريقة فحياتي بديت كنتنفس بشكل قوي بحال غادي نتخنق و كنسمع اصوات حدايا شي حد كيتنفس حدايا و غواث و صراخ ولكن ماجانيش الخوف حينت ولفت بقيت هادئة ومركزة فالظلام و عينيا مغمضين حسيت بشعور غريب بحال إلى كنطفو فالهواء بديت كنبعد على مكان حسيت براسي بحال إلى واقفة فالغرفة حدا سرير ديالي بقيت مركزة فالظلام و بديت كنلاحظ أنني كنشوف غرفتي تلفت للناموسية لقيت راسي ناعسة كان هذا أخطر و أرعب منظر شفتو فحياتي تبعت النصائح و ماشفتش راسي فالحالة النجمية حينت إلى شفتها غنفيق من النعاس دابا ممكن ندير اللي بغيت نتمشى ولا نخرج و نشوف أمور واقعية العالم النجمي عالم أغرب من الخيال فيه أمور عجيبة و يمكن دير اللي بغيتي تطير تشوف ناس تاكل تنفس تحت الماء تهضر مع الحيوانات و لكن أنا ماكانش هدفي هادشي مشيت نيشان لغرفة ماما دخلت مالقيتهاش فين هي ولكن حسيت بشي واحد مغطي فالناموسية هزيت الغطا كنت غنسخف كانت قطة هي اللي ناعسة مشيت كنجري تأكدت باللي ماما ماشي إنسية و هي القطة اللي هجمات عليا ماما جنية 5 سنين و أنا عايشة معاها و هي كانت المساعدة ديال حليمة مشيت لحمام شفت فالمرايا لقيتها كاينة جالسة و كتسناني : شكون نتي شافتني و لأول مرة تهضر معايا : أنا وئام ـ و أنا ـ حتى نتي وئام أنا و نتي واحد تصدمت من جوابها توقعت كلشي إلا أنني نكون أنا ووئام واحد : وهاذ الجسد ـ هاذ جسد صاحبتنا ماجدولين ـ إمتى مت ـ نتي حية أنا كاعمة ميتة غير محبوسة هنا كنتسناك ـ رجعي ـ لا ماغنرجعش حتى يتصلح كلشي قلبي على الحقيقة هاذيك المرأة ماشي ماماك بل هي سبب فكلشي هي و حليمة و محسن منين يتصلح كلشي ذيك الساعة نرجع ـ فين واليدينا ـ ماتو نهار 15 سبتمبر 2010 ـ شنو وقع ـ جلسة استحضار الأرواح غيرات كلشي قلبات حياتنا حتاجزتني هنا و نتي عشت فجسد آخر الجسد اللي استاعن بيه النكروماسي من أجل طقوس السحر الأسود ضرباتني الفيقة لقيت راسي فالسرير عشت حلم حقيقي بحال الحياة اليومية و بديت كنشك واش كنت فالواقع و لا فالأحلام فقت ولكن النتيجة وحدة سواء كان الأمر حقيقي أولا لا أنا وئام عرفت الحقيقة كاملة و لكن ماعرفتش الأسباب ولا كيفاش وصلت لهنا وهنا غتبدا رحلة اكتشاف الذات أولا و معرفة حل اللغز ثانيا وشنو علاقة عائلتي بهاذ السحارة المشعوذين 

هزيت الكتاب اللي خذيت لمحسن و بديت كنقرا كانو معلومات على عائلة ماجدولين و حساباتهم البنكية محسن وهمها بالحب و الكلام المعسول و كانو بغاو الثروة ديالهوم على مابان ليا شفت حتى تصاور ديال آية و بزاف ديال البنات و كلها و قصتها و ثروتها ولكن وئام كانت من أسرة فقيرة شنو علاقتها بهادشي هاذو باينين نصابة و كينصبو غير على الناس اللي لاباس عليهوم أنا وعائلتي شنو دخلنا فالموضوع مشيت لدار نهال خذيت التصويرة حينت هاذي هي التصويرة الوحيدة اللي عندي على راسي مشيت لمركز الشرطة ولأني من عائلة غنية و جيت بسيارة فاخرة كلشي تعامل معايا مزيان و عطاني وقت دخلت عند عميد الشرطة : سلام ـ سلام آنسة باش ممكن نعاونك ـ ماجدولين رودريغيز كنقلب على واحد البنت ـ مرحبا ـ هاذ البنت سميتها وئام الأب ديالها سمحمد و الأم كلثوم كانو فواحد الدار تحرقات و من بعد مابقا حد جاب عليهوم شي خبار وهاهي تصويرة ديال البنت بقى العميد كيقلب فالبيسي حتى كيبان ليا ك Imprimer واحد الورقة : هاذ العائلة كانت ساكنة فالرباط و ماعندهومش شي سوابق و فعلا مور ماتحرقات دارهوم مابقينا عرفنا عليهوم شي خبار و سدينا القضية خذيت ذيك الورقة و شكرتو المعلومة الوحيدة اللي كانت مهمة هي مكان الازدياد كان مستشفى مولاي عبد الله فمدينة سلا شديت الطريق لسلا وصلت للسبيطار بديت كنسول فقسم الأرشيف على معلومات حتى واحد ماعطاني شي خبار بغيت نمشي و هي توقفني واحد الممرضة : سمحيليا ـ نعم ـ كتسولي على الولادة ديال وئام ـ تماما كتعرفي شي حاجة ـ تسناي حتى نسالي شي شغل و أنا معك بقيت كنتسناها فالجردة بانت ليا واحد القطة كتشوف فيا عرفت باللي هوما مراقبيني و عارفين تحركاتي و أكيد غيكونو موجدين ليا شي حاجة ماهتميتش كل اللي هامني نعرف الحقيقة ديالي جات الممرضة : سمعي أنا اللي كنعرف أن ولادة وئام كانت أغرب ولادة شافها السبيطار أنا كنت من الناس اللي ولدو كلثوم تعجبت كيفاش هادشي : من الناس ؟؟ ـ أه حينت ولادة كلثوم كانت صعيبة و كانت غتموت داكشي علاش كان طاقم طبي اللي تكلف بالولادة ـ من بعد أش وقع ـ ماعرفتش حينت مور ماولدات كلثوم فقنا فالصباح حتى شي واحد مالقاها ـ كيفاش ياك قلتي باللي ولادتها صعيبة و كانت غتموت ـ راه الأمر غريب راه قلت ليك باللي أغرب ولادة شاف السبيطار أنا ماعارفاش بزاف ديال الحوايج و لكن أحمد العساس يقدر يكون عارف شي حاجة ـ فين نقدر نلقاه ـ ماعارفاهش فين ساكن هو شد تقاعد مشات الممرضة علاش ماما هربات من السبيطار و علاش عاشت حياتها كاملة هربانة مشيت عند العساس جديد : سمحليا ـ نعم يا أنسة ـ كتعرف فين ساكن أحمد العساس اللي قبل منك ـ لا حسيت بيه كيكذب و عارف جبدت 200 درهم عطيتها ليه : هاذو أسرار جبدت 400 درهم بقا كيشوف فيها : 1000 درهم و نقوليك جبدت عاوتاني 400 درهم و عطيتها ليه : أحمد ساكن فبوقنادل ماشي بعيد على سلا سولي على قهوة مولاي أحمد كلشي غينعثها ليك ركبت سيارتي و مشيت نقلب على مولاي أحمد العساس

دخلت لسيارة و كيف العادة شعور أن شي حد معايا مكيفارقنيش بديت كنسمع الأصوات و الضحك كيف العادة :وئام هههه ماحبستش ديماريت فاتجاه بوقنادل وصلت من بعد أقل من نصف ساعة سولت الناس على القهوة نعتوها ليا سولت السرباي على مولاي أحمد مول القهوة بدا كيضحك : لا ختي القهوة غير سميتها مولاي أحمد ماشي هو مولاها ناري ياكمة العساس ضحك عليا : ولكن أنا كنقلب على العساس اللي كان خدام فمولاي عبد الله ــ عندك الصح كان سرباي معانا شي أيام و لكن الباطرون جرا عليه ـ فين خدام دابا ـ غير هنا عساس فالحدائق العجيبة شكرت ذاك الدري و توجهت l’exotique : سلام ـ و عليكم السلام ـ السي أحمد عفاك ـ هو هذا شنو بغيتي ـ عفاك بغيت نسولك على ولادة وئام حسيت بيه تغيرو فيه الألوان : ماضي قديم مكنبغيش نذكرو ـ عفاك يا سيدي مسألة حياة أو موت خاصني نعرف هاذ الماضي باش نواجه الحاضر و نغير المستقبل حسيت بيه رتاح من هاذ الكلمة نغير المستقبل كأنه كان كيتسنى هاذ بصيص الأمل من شحال : كلثوم جات فحالة صعيبة أما راجلها فكان غير غادي جاي فالسبيطار و كيقول عتقو ليا وئام كانت مراتو بين الحياة و الموت و جاو الأطباء قالو ليه غنضحيو بالجنين من أجل إنقاذ الأم رفض و ففمو غير وئام قدرو الأطباء يعتقوكم بجوج هذيك الليلة دازت صعيبة فالسبيطار كنت كنحس باللي كاينة شي حاجة غريبة وواحد القطة غير كتراقب الغرفة عييت مانجري عليها وهي لاصقة كنت كنشوف بحال شي خيال فالغرفة كاملة كيراقب و كيشهد عملية الولادة خفت بديت كنسمع أصوات " وئام غتجي للدنيا " وضحك و فرحة منين تزدتي حطوك فواحد البيت كنتفاجئ بكلثوم يلاه نفيسة و هزاك و كتهرب بيك بقيت تابعها رغم أنها كانت غتموت حسيت عندها قوة غريبة ضرباتني ضربة وحدة وتلاحيت بعيد و من تما و أنا فيا عاهة مستديمة ورجلي كنعرج بيها ـ أش طرا من بعد بغا يهضر و يعاود ليا كنتفاجئ بالقطة هجمات عليه و بدات كضرب فيه تدفع مع الطريق واحد السيارة ماعرفتش منين خرجات ضرباتو وحطاتو جثة هامدة و من بعد غبر ليها الأثر بدا شي واحد كيجرني من شعري كنشوف فالأرض كنلقى خيال ولكن ماحسيت بحتى واحد واقف حدايا ماكانش جسم مادي مجرد روج بغيت نهرب ماكيبان ليا حتى واحد بديت كنشوف فالقطة ماعندهاش ظل و كيقولو باللي المخلوقات اللي ماعندهاش ظل كتكون شي حاجة مانقدروش نشوفوفها بالعين المجردة كانت الروح أقوى مني جراتني للسيارة و ركبت بقيت كنشوف فالسيارة كتزيد بوحدها حتى وصلت ثاني للدار و بقا جارني مع الأرض و كيضحك حتى دخلني لبيتي و سد عليا بقيت تما كنحاول نفهم خذيت الكتاب كنقرا كل المعلومات بغيت نقرا غير على راسي طحت على واحد المعلومة " في ليلة عاصفة و باردة سنقدم القربان " قربان ؟ شفت تاريخ ميلادي أنا تزاديت ف 15 سبتمبر 1989 فهمت باللي هاذ الضحايا 8 اللي ماتو كاين اللي فيها كانت قربان لإتمام الطقوس و كانت اللي كانت ضحية لعملية نصب و لكن أنا مامذكورة فحتى شي صفحة ولا جبدوني على ود شي غرض شنو كانت علاقتي بهاذ الناس لا أنا و لا عائلتي حطيت احتمال واحد ممكن تكون هاذ الدار هي أنسب مكان لإتمام الطقوس

كنلقى معلومة بلاصة ماتفيديني كتزيد من الحيرة ديالي و كتزيد تعقد ليا القضية خذيت البيسي بديت كنقلب على مفهوم السحر الأسود و طقوس النكروماسي السحر الأسود أو كيما كيبغيو يسميه البعض السحر المظلم سحر كيعتمد على القوى الحاقدة والروح الشريرة و كيتستعمل من اجل الشعوذة و تحقيق الطلبات أما النكروماسي فاقل مايمكن نوصف هو اللعب مع الشيطان و كيحتاج الشخص اللي غيقوم بطقوس النكروماسي لخبرة بتعاويذ السحر الأسود وشجاعة ماتخليهش يخاف أي حاحة و أهم حاجة خاص يكون عندو مساعد باش يتدخل فحالة الطوارئ أهم حاجة فالطقوس هو اختيار المكان المناسب صافي هنا فهمت باللي فرضيتي تقدر تكون صحيحة لأن الدار فين ساكنة متناسبة تماما للشروط حينت كانت دار معزولة أما من ناحية التوقيت ففهمت سبب اختيار 15 سبتمبر حينت خاص الطقس يكون عاصف و بارد و الرعد و فهمت حتى سبب سماعي لصوت ريح رغم أنني فالصيف حينت فهاذ الوقت فاش كتظهر أرواح الموتى و نقدرو نسيطرو عليهوم و من بعد ماتكمل هاذ الشروط عاد ممكن تنفذ طقوس النكروماسي بتحدد الموقع أول و رسم دوائر حسب عقيدة كل شخص و لكن أهم حاجة تكون دائرة خارجية تحدد الأرض و أخرى داخلية كيوقف النكروماسي و مساعديه فمركزها و الغرض الرئيسي من هادشي هو تحديد مساحة معينة من الأرض للبدء في تطهير هذه المساحة بالماء المقدس و التعاويذ الخاصة و كتابة حتى أسماء الآلهة و هادشي كيضمن السيطرة على الأرواح و استدعائها و يضمن حتى وجودها فهاذ المكان و إجبارها على تحدث بالحقيقة وبقات أهم حاجة باش تكمل الطقوس "الجثة " ولكن ماشي أي جثة تصلاح لهاذ الطقوس خاصها تخرج من القبر فمنتصف الليل و من الأحسن تكون جثة شي حد مات مقتول كملات الشروط غيبداو الطقوس كتبدا مرحلة العبث بالجثة الميت و استدعاء أرواح الموتى من العالم الآخر وهذ أخطر مرحلة حينت الأمر كيتعلق بالخبرة حينت الأرواح كتكون ثائرة وفأغلب الأحيان كتبان فهيئة أسود مخيفة كتحيط بالدائرة المقدسة قبل مايبدا النكروماسي فالسيطرة عليها و معه مساعد و من بعد كيبدا يطرح الأسئلة مع مراعاة المرحلة الانتقالية أي أنه فبادئ الأمر كيوجه أسئلة بسيطة لإنعاش ذاكرة الميت وعاد يبدا فطرح ماشاء من الأسئلة أو التهام أجزاء من الجثة دون تحضير روح الميت و منين يسالي خاصو يعاون روح الميت للعودة للعالم الآخر ويدفنو أولا يدفن ماتبقى منه مع ترديد تعاويذ خاصة تضمن عودة الميت إلى عالمه و باش مايعاودش يحاول يسيطر على النكروماسي من بعد و هي خطوة مهمة باش مايتفاجئش فيوم بروح كتحاول تسلبك حياتك (منقولة بتصرف من كتاب عالم ماوراء الطبيعة ) بديتت كنفهم الأمور شوية بشوية و فهمت سبب هاذ الفوضى أكيد وقع شي خطأ فجلسة استحضار الأرواح قلبات الأمور حاجة وحدة مزال مافهمتها علاش عايشة فهاذ الجسد من غير موضوع الدار شنو علاقتي بهاذ الفيلم كامل

شحال ديال العقائد و السحر القضية كبيرة من داكشي اللي كنت كنعتاقد أنا مايمكنش تكون علاقتي بهادشي كامل غير الدار حينت هوما كانو فرحانين بولادة و كانو كيتسناوني نخرج للدنيا على حساب ماقالي أحمد قبل مايموت فكرت ندير حتى أنا جلسة لإستحضار الأرواح و نفهم منها كلشي تحل باب بيتي خرجت ماكنلقا حتى واحد فالدار أوااااه علاش سمحوليا نخرج مشيت ركبت السيارة العجب ماكاين حتى شي مضايقات أكيد غيكونو سمعوني منين هضرت على رغبتي فاستحضار الأرواح توجهت ثاني للمكتبة بغيت شي كتاب كيوري الطريقة كانو بزاف ديال الطرق ولكن كلشي كيتافق فحاجة وحدة تكون جالس فجلسة فنجان قدامك و كاتب حروف الهجاء فورقة تفكر فشي روح و تبدا تسولها و الفنجان من تلقاء نفسه غيعطيك إجابات و يتجه إلى الحروف و نتى كتجمع الكلمات : لوح الويجا هي أشهر طريقة مابقيتش كنتلفت عارفة شي روح ميت ثاني : الويجا ؟ ـ وي الويجا هي أشهر طريقة لاستحضار الأرواح يفضل لعبها فجماعة لكن مدام نتي ماعندك حد يمكن تلعبيها بوحدك ـ بغيت نسولك ـ تفضلي ـ نتي ميتة ياك ـ أنا جيهان مت نهار 10 سبتمبر 2010 ـ مكتعرفي عليا والو ـ ماجدولين كانت بنت كتبغي محسن و مستعدة دير أي حاجة على قبلو وهو باغي غير فلوسها حليمة كانت شعوذة و كلشي مدفون فالصندوق ونهال سرقات ساروت الصندوق هادشي اللي عارفة الأحداث من بعد ماكنتش شاهدة عليهوم ـ وعلاش أنا كنشوف الموتى من دون الناس علاش أنا كيوقعو ليا هاذ الأحداث كاملة واش كتبانو لكلشي و لا غير أنا ـ مكنبانو لحتى حد من غير للشخص اللي كان سبب وراء وفاتنا تصدمت بقات كلماتها كتردد فوذني " الشخص اللي كان سبب فوفاتنا " كيفاش زعمة واش أنا اللي كنت السبب أشنو درت مالقيتهاش حدايا ختافات سبب فوفاتهم واش كنت أنا هي السبب واش أنا هي النكروماسي و دابا مجدولين كتعاقبني حينت لعبت بجسدها واش هذا هو سبب وراء رفض وئام ترجع ليا جسدي مابغاتش مزال تعيش هاذ الحياة وئام على مكيبان ليا رتاحت وخلاتني أنا وسط المشاكل خلاتني روح بلا ذاكرة و كتقاسي مع الإنس و الجن و السحر و الشعوذة و كتقاسي سر و لغز هاذ العقد مشيت لدار نهال دخلت مالقيتهاش بقيت كنقلب فين مدفونة لقيت قبرها بلا مانتردد هزيت الفأس و بديت كنحفر لقيت جثتها أخيرا بقى كيما هي بحال إلى ماتت غير البارح و حولها عقد أكيد فيه ساروت الصندوق قربت لعنقها خذيت الساروت حلات عينيها تخلعت ميت يحل عينيه بديت بغيت نهرب هي ماعرفتش منين جاتها ذيك الشجاعة و بدات شاداني : نتي السبب فكلشي نتي غدرتينا كاملين عماك الطمع و كذبتي علينا اليوم نتاقم منك بديت كنتخلس منها وهي مزيرة القبضة ديالها قربت ليها العقد حدا راسها غير شافتو بدات كتغوث : بعديه لهيه خليتو حتى حسيت بيها ضعفات وخرجت من القبر وعاودت رجعت التراب وخرجت من الدار 

رجعت لبيتي حليت الصندوق صافي اليوم غنفهم الأمور كثر لقيت لوح الويجا و شي كميسات كانو 8 و فكل كميسة حليتها لقيت خصلات من شعر و أظفار مخلطين بشوية ديال الدم تروع ليا خاطري بان ليا ألبوم الصور كانت صورة ديال كل واحد مربوط بسحر فهاذ الكميسة أول ضحية كانت البنت زهرية خت نهال و من بعد آية و جيهان عاد جات نوبة ديال نهال و ماجدولين و الواليدين ديالي شكون مول الكميسة الثامنة و عاد نعرف شكون صاحب التاسعة 9 ديال الناس طبق عليهوم السحر عارفة منهم غير سبعة الثامن كان قبل 15 سبتمبر 2010 حينت شفت الكميسة فعقد نهال و التاسع غيكون فهاذ النهار 15 سبتمبر و لا مور شكون هوما هزيت مذكرات محسن اللي سرقتها ليه من البيت كل كتاباتو كانت على ماجدولين لاحظت باللي محسن كان كيبغيها بصح ماشي كذوب و لا كيتفلى عليها حينت الإنسان ماكيكذبش ف journal intime الخاص بيه قريت جملة اللي ممكن تغير " ماجدولين حب حياتي و لكن مايمكنش نكونو بجوج حبي مستحيل اليوم طلبات مني الواليدة ديالي نستحضر روحها واخا حية كنبغيها بجنون و لكن حبي بدا بكذبة لا تغتفر و أنا أصبحت أسير و خادم الجان " كانت هاذ المعلومة نهار 3 نونبر ونهار 9 سبتمبر كتب " ماعندي حتى خيار خاصني ندير جلسة استحضار الروح واخا ماجدولين حية و كنبغيها " استحضار روحها واخا حية مشيت كنقلب على أضرار استحضار روح الحية مشيت لخدمة Ask وطرحت السؤال " ماذا يحدث عند استحضار روح شخص حي ؟؟" جاني الجواب فالحين " لا أنصحك أبدا بالقيام بهذا فما يحدث كالتالي : يصاب الوسيط بإجهاد شديد أثناء العملية الاتصال و يختفي بؤبؤ العين ويتحول لون حداقة العين إلى الأحمر تدريجيا مع ألام حادة فالرأس 2 ـ تفشل عملية الاتصال و يموت صاحب الروح عند القيام بهذه المحاولة 3 ـ عند تكرار المحاولة تحضر الروح بعد عناء و يكون صاحبها قد مات جراء المحاولة الأولى 4 ـ تكون هذه الروح غاضبة جراء ما حدث و لن تترك القائم على التحضير أبدا وشأنه إلا أن توصله للجنون و من ثم الانتحار " الانتحار إذن محسن مات و بهاذ السبب ماتت ماجدولين بقى فبالي الفضول ولكن لأي سؤال جواب طرحت سؤال ثاني "إذا تمثل الجني بإنسان كيف أميزه إذا كنت لا أعلم ؟ " في ساع جاوبوني : تميزه بأمران الأول أن عيناه تكون بيضاوية وليست مستديرة وأن نفسه يكون حار جدا لا ماما ولا محسن عينيهم دايرة كنت ديما كنقوليهوم عينيكم كيعجبوني مختالفين ساعة و نعم الاختلاف خاصني نستحضر روحه و نفهم منو كلشي قلبت واش ممكن ندير جلسة استحضار الأرواح بوحدي الأمر فيه أخطار و لكن ماشي ممنوع وجدت الجلسة كلشي كان موجود فالصندوق لوح الويجا و الشموع طاولة بيضاوية الشكل و ضويت الشمع على الطاولة حطيت 9 ديال الشمعات حينت قالك من الأفضل مايقلش عددهم على ثلاثة و تكون قابلة للقسمة على 3 طفيت كاع الاضواء و بديت كنادي على روح محسن : عزيزي محسن جئت إليك بالهدايا من الحياة إلى الموت تواصل معي و تنقل بيننا أشعرني بوجودك بداو الشمع كيطفى و يشعل و كنسمع أصوات سمعت باب الغرفة تحل و دخل منو شي حد سمعت صوتو وتخلعت هو الشخص اللي ديما كيعيط بسميتي وئام و كيهاجمني فهاذ الغرفة سمعت صوتو : وئام جيتي أش بغيتي من مور مادرتي اليوم طحت بين يدينا اليوم الإنتقام يا وئام هههههههههه بديت كنحس بيه كيختارق جسمي بديت كنغوث بديت كنحس بأرواح أخرى كتطاردني و فأقرب فرصة دوزت الفنجان على وداعا و حبست الجلسة 

كملات الجلسة اللي كنت غنموت فيها هبطت لقيت ماما فالصالة و كانت كتلبس سباطها باش تخرج تخبيت و بقيت مراقبها أول مرة نشوف رجليها كانت رجلين بقرة سديت فمي ناري تأكدت باللي هاذ السيدة فعلا جنية خرجات و حتى أنا ركبت سيارتي غادا بدون وجهة و غير كنبكي لا قوى الخير معايا و لا قوى الشر باينة منوضاها مع كلشي و حتى واحد ما معايا أنا عايشة وسط عصابة ديال السحر و الشعوذة و بقيت 5 سنين مع جنية ناري و دابا أش بغاو مني علاش تابعيني شنو حقيقتي كيفاش كان الماضي ديالي و أهم حاجة شنو وقع 15 سبتمبر 2010 مع 01:30 بالضبط هاذ التاريخ مشئوم وشنو كاين فهاذ العقد ماعرفتش راسي فين وصلت بقيت غير كنتمشى الليل بدا كيطيح و أنا فبلاصة مجهولة نزلت من السيارة نشوف أنا فين كاينة لقيت راسي فشي دوار ماعرفتش فين و هاذ السيارة كتعكس غير فالأوقات الزينة الوقت اللي كنكون محتاجاها لقيت دابة بعدت منها تبعاتني و بقات مورايا هزيت عصا باش نخلعها شافت فيا و نطقات : صحابليك أنا دابة باش تبقاي ضربي فيا بقيت مشوكية و ماعارفة ماندير : شكون نتي قفزت من بلاصتي درت كنلقاها واحد السيدة كبيرة هازا بيل : سلام يا لالة جيت طالبة ضيف الله ـ مرحبا بضيف الله داتني لواحد الدار تعشيت معاهم و جلست فواحد البيت داني نعاس و نعست بقيت كنحلم براسي فغابة بوحدي و بالحنوشة تابعيني و أنا كنحاول نهرب منهم و لكن كانو غير كيلاحقوني شوية حسيت براسي ميتة و الناس هزوني و داوني للقبر بقيت بوحدي جا عندي منكر و نكير و بداو كيسولوني شكون ربك ما دينك و من هو نبيك ماقديتش نجاوب بغيت نهرب بغيت نخرج من هاذ القبر بقيت كنجري و نجري حتى وصلت لمكان عالي شفت لتحت لقيت ماما فواحد النار و كتقوليا : بنتي وئام رجعي باقي عندك الوقت تفكي من هادشي ماشي بحالي رجعي يا بنتي باقي الوقت باقي الوقت بديت كنغوث و نغوث حتى كلشي فاق جاتني بحال نوبة ديال الصرع عيطات ذيك المرأة على راجلها كان فقيه و من حفظة القرآن بغا يقرا عليا : بعد مني ماتقربش ليا ماتقرا عليا والو كتسمع إلا القرآن عفاك بديت كنبكي و هو كيحاول يهدني قرب ليا ضربتو وهو بدا كيردد آيات من الذكر الحكيم : { قالوا يا موسى إما أن تلقي أو نكون أول من ألقى * قال بل القوا فإذا حبالهم و عصيهم يخيل إليهم من سحرهم أنها تسعى * فأوجس ف نفسه خيفة موسى * قلنا لا تخف انك أنت الأعلى * و الق ما في يمينك تلقف ما صنعوا إنما صنعوا كيد ساحر ولا يفلح الساحر حيث أتى } ( طه : 65-69) صدق الله العظيم تهدنت شوية مور الآية و قدرت نعس بسلام منين فقت فالصباح علموني باللي الفقيه بغا يشوفني لبست عباية و درت الحجاب دخلت عندو : السلام و عليكم ـ و عليكم السلام و رحمت الله تعالى و بركاته جلسي يا بنتي جلست و بديت كنشوف فالملامح ديالو رجل غير شوفتو كتريح باين الدين و الخلق الطيب من ملامحه : بنتي منين رقيتك البارح عرفت باللي حالتك صعيبة شنو قصتك باش نقدر نعاونك ـ ماعرفتش منين نبدا اللي كان عرف من هاذي 5 سنين حليت عيني فواحد الناس قالو ليا باللي هوما عائلتي من بعد بديت كنعرف شي أسرار و كنتلاقا بالأرواح و عرفت باللي هوما مشعوذين و باللي حتى أنا كنت معاهم ماعرفتش درت جلسات استحضار الأرواح قطع هضرتي : بنتي الروح المكان الوحيد المتواجدة فيه هي البرزخ و هي بأمر الله سبحانه بوحدوا و حتى واحد ماعندو القدرة يتحكم فيها ـ ولكن أنا شفت بعيني ـ عقلنا الباطني و اللاواعي ديالنا كيخلينا نتخيلو شي أمور و نصدقو أنها الحقيقة وزيد على ذلك أنه يقدر يكون شيطان تسيف لينا بهيئة إنسان أو روح ـ و علاش هادشي كامل ـ الغرض الوحيد هو تآمني بهاذ المعتقدات و تعتابريها كاينة حينت الإيمان ديالك هو اللي غيسهل عليهوم الطريق باش يتحكمو فيك و يديرو فيك مابغاو و كيبان ليا نتي كنتي معاهم وهوما ماغيخليوكش فخاطرك 

وشنو الحل أنا بغيت نعيش حياتي عادي أنا حتى جسدي ماعايشاش فيه ـ الحل يا بنتي ساهل و لكن حنا اللي كنخليو فيها كنلتاجئو للأشياء اللي ماغتنفعناش و كنلتاجئو للمخلوق و كانساو الخالق الحل هو تقربي من الله الصلاة و العبادة غتعصمك من الإنس و الجن قوليا كتصلي ؟ ـ لا ماعمري عقلت على راسي حطيت راسي فالأرض ـ هاللي قلنا نتي بحال شي بوابة ماعندهاش حارس قادرين يدخلو و يخرجو و يتحكمو فيك كيف بغاو نضت ذيك الساعة توضيت و صليت بديت كنحس بحال شي واحد كيدفعني و مانعني نصلي و نسجد لله ولكن رغبتي كانت قوية باش نخرج من هاذ الحياة و قريت القرآن بديت كنحس بالراحة دازت 3 أيام قادرة نعس و نفيق على خاطري شحال زوين تعيش حياة طبيعية بلا صداع بلا تعب بلا رعب و لكن هوما أكيد ماغاديش يخليوني فخاطري نضت فالليل مفزوعة شفت الشرجم بانت ليا القطة كتشوف فيا و كضحك بديت كنقول أعوذ بالله من الشيطان الرجيم رمات ليا واحد الورقة ماحليتهاش فقت فالصباح و مشيت نيشان عند الفقية حلها وبدا كيقراها " ماعندك فين تهربي نتي بين عينينا و غادي تكملي داكشي اللي بديتي غتكمليه يا وئام ولا عاقبتك مغتكونش سالمة " بقيت كنقفقف ماغيخليونش فخاطري : شنو خاصني ندير ـ هادشي خطير إلا بغيتي تحبسيهوم خاصك تحبسي أفعالهوم و على ماكيبان ليا هوما ناويين على شي خطير و نتي باقي ماوصلتي لدرجة الإيمان القوي باش يبعدو منك إذن خاصني نرجع منين بديت و نحاول نفهم كل خيوط الحكاية رجعت للرباط مشيت لمركز الوقاية المدنية و قلبت على أسباب و ظروف الحريق قالو ليا باللي فالساعة 01:30 جاهوم إشعار بوجود حريق كانو كيسمعو صوت الغواث الداخل ولكن تفاجئو منين دخلو مالقاو حد ولا حتى جثة و سبب الحريق مجهول عطاني سمية الإطفائي اللي كان مكلف بالحريق خذيت العنوان و توجهت لدارو كانت فواحد العمارة فأكدال دقيت حل ليا الباب بقا متفاجئ منين شافني : ماجدولين ـ كتعرفني ـ مايمكنش نتي حية دخلت للدار بلا عراضة : قوليا كلشي اللي كتعرف بقى ساكت و كيشوف فالمكان و كيغمض عينيه : الله ياخذ الحق تورطت ولكن وئام السبب ـ كتعرف وئام ـ وياريتني ماعرفتها ـ عاود ليا كلشي نقدرو نتخلصو من هاد العذاب ـ وئام كانت بنت أكبر مشعوذة فهاذ البلاد كانت مها كتقن كل أنواع السحر منين تعرفات على سمحمد و كان واحد من ضحايا حليمة بغاها و بغاتو وتزوجات بيه فالسر و بغات تخلص من الماضي ديالها و لكن بقاو ملاحقينها و منين عرفوها حاملة فرحو حينت غتجيب ليهوم مولود لهاذ الدنيا غيربيوه و يعلمو فيه من الصغر أصول السحر و الشعوذة الشيء اللي رفضاتو كلثوم و بقات حياتها كلها هربانة حتى وصلو لوئام و قالو ليها الحقيقة و حقيقة مها و الغريب أنها بغات تعاون معاهوم و تهرب من الفقر اللي كانت عايشة فيه و تحولات وئام لساحرة و ضرات راسها و عائلتها و كل اللي كيعرفها تحولات لمسخ كيضر كل اللي كيقرب ليها ـ و نتى شنو علاقتك بيها ـ تعرفت عليها و من بعد تعرفت على حليمة ورباعتها شفت الفلوس و وليت خادم ليهوم ولكن عشت حياة صعيبة كلها خوف أنا كنت إطفائي عايش بخير و مرتاح هاذ الراحة اللي فقدتها من نهار شفت وئام و رباعتها و بدا كيغوث طلقو مني بعدو مني خفت بزاف منين شفت حالتو شديتو من ذراعو : تهدن شنو طرا من بعد شنو وقع 15 سبتمبر 2010؟ ـ ماتجبديش هاذ النهار وئام خدعاتنا جميع غدارة لعبات بينا بقا كيغوث هز موس كان حداه خفت بزاف هربت سديت الباب و هبطت مع الدروج

كان غادي يقتلني كون ماهربتش ليه مشيت للباركينغ باش نهز سيارتي و نمشي من هنا بقيت غادا وحاسا شي واحد موريا كنتلفت مكنلقى حد درت نكمل طريقي لقيت بنت وجهها مغطي بالشعر مقابلة معايا تصدمت منين شفتها كان وجهها كيخلع و عينيها كحلة وسنانها قهويين وريحة خانزة بزاف دفعتها طاحت وبقات كضحك بقيت كنغوث : مابقيتوش كتخلعوني أنا غنحد ليكوم المخططات ديالكم غير قلت هاذ الهضرة بديت كنسمع أصوات و شي حد بدا كيضربني و يرميني مع الأرض بديت كنتجر و كنتخبط حتى السما و نتخبط فالأرض و سمعت واحد الصوت : غتكملي و ماشي لخاطرك يا وئام ولا غتعيشي اللي ماعمرك تصورتيه ـ ماكنخافش و ماغنكملش بدا الغواث كيتزاد شوية كنشوف بحال شي حاجة تلاحت نضت نشوف شنو لقيتو راس الإطفائي و مكتوب فزجاج السيارة نتي التالية ركبتها و توجهت مباشرة للدار باش ناخذ أثار السحر و نبطلو لبست واحد السلسلة فيها آية الكرسي و هزيت الماء اللي مقروء فيه القرآن زعمت ودخلت أنا اللي بديت هادشي أنا اللي غنكملو و بديت كنرش الماء فكل بلاصة قبل ماندخل و أنا كنردد الدعاء " اللهم اجعل بيني و بينهم سدا من نور عظمتك و حجابا من قوتك و جندا من سلطانك فانك حي قادر اللهم اغش عن أبصار الناظرين حتى أرد الموارد وأغش عني أبصار النور و أبصار الظلمة و إبصار المريدين لي السوء حتى لا أبالي بإبصارهم يكاد سنا برقه يذهب الإبصار " فعلا ماشافونيش منين دخلت هزيت الكميسات و رجعت ثاني و أنا مزال كنردد الدعاء و كنقول أدعية أخرى " اللهم اجعل خيرهم بين عينيهم و شرهم تحت قدميهم وخاتم سليمان بين أكتافهم فسيكفيكهم الله و هو السميع العليم صبغة الله و من أحسن من الله صبغة سبحان القادر القاهر الكافي و جعلنا من بين أيديهم سدا و من خلفهم سدا فأغشيناهم فهم لا يبصرون صم بكم عمي فهم لا يعقلون أولئك اللذين طبع الله على قلوبهم و على سمعهم و أبصارهم و وأولئك هم الغافلون " (دعاء يقيك من الحسد و يقيك من الخوف و يوفقك في كل عمل تنويه ) بغيت نخرج شفت حليمة و ماما جالسين ناري كانت أول مرة نشوفها بصورتها الحقيقة هاذ الجنية عايشة معاها 5 سنين كانت كتعنقني و توكلني إلى كنت مريضة مصيبة هاذي رجليها كانو رجلين بقرة و راسها فيه قرون صغيورين و ملامحها شبه بشرية ولكن صورتها كانت مرعبة وبديت كنسمع الحوار : وئام ماعندها فين تهرب نهار 15 سبتمبر غادي نجيبها تكمل طقوس السحر الأسود غير نتمناو ماتدريهاش بينا ثاني بديت كنسمع صوت أمي البشع : ماشي مشكل واخا صبرنا 5 سنين ولكن الأولياء قالو ليا مزيان تكون الطقوس ف 2015 العدد 15 قابل للقسمة على 3 وهذا كيزيد من نجاح الطقوس غير بلاتي ياهاذ المشعوذين نهار 15 سبتمبر غنجي ولكن باش نوقفكم عند حدكم و نساليو هاذ الشعوذة باقي 15 يوم خاصني نقوي إيماني و نتعلم مزيان كيفاش نواجهكم ياهاذ السحرة خرجت من الدار وضربت معاها موعد نهار 15 سبتمبر 

وصلت للدوار و مشيت عند الفقيه و عطيتو السحر بقى كيقرا عليه حتى بطلو : اللي كنت خايف منو طحت فيه السحر مدفون فالدار وهادشي غير شي حاجة قليلة ـ عارفة سمعتهوم كيحضرو على شي جلسة كبيرة نهار 15 سبتمبر ـ غنمشي معك ماغنخليكش بوحدك غنعاونك حتى تخلصي منهم ـ الله يجازيك بخير خيرك عمري ننساه و ماعندي حتى باش نخلصك ـ هادشي فسبيل الله غير الله يقدرنا نمنعوهم أنا غنرقيك و نقريك سور و آيات باش نحاربوهوم وربي معانا و نيتك صافية و باغا الخير ـ الله يسمح ليا على داكشي اللي درت واخا ما عاقلاش على الماضي ـ سمعي يابنتي ربي كيغفر كل الذنوب إلا الشرك بيه ـ علاش هادشي ماشي شرك اللي كيلتاجئ لشي حد من غير الله ماشي أكبر معصية و أكبر شرك ـ إن الله غفور رحيم و اللهم أحسن خاتمتنا و إن شاء الله تكون حياتك الجاية حسن من اللي داز طمني الفقيه بهضرتو بقى ماتفكرت أش درت مابقيتش خايفة كل نهار كيرقيني الفقيه و كنزيد نحس براحة صلاة فوقتها و كنقرا على الأقل جزء من القرآن كل يوم مابقيتش خايفة من حتى حاجة من غير الموت ماشي على شي حاجة غير خايفة نموت قبل مانتوب و نصلح أخطائي و خايفة حتى نعيش حياة معذبة و غير هربانة و خايفة بقيت جالسة و كنشوف تصاور و كنحاول نتذكر شفت تصويرة ديال ماما تفكرت واحد الحدث " بنتي وئام الله يرضي عليك راه الطريق ماساهلاش ما بغيتكش تعيشي بحالي راك غتمناي الموت كل نهار حينت غيبان ليك أرحم من هاذ العيشة سوليني أنا اللي عشت هادشي " ماما ماكانتش بغاتني ندخل هاذ الحياة ياريت سمعت لهضرتها بدات الذاكرة كترجع ليا و بديت كنتفكر لقطة بلقطة منين أول نهار شفت حليمة و هضرات معايا تسدو ليا عينيا ووافقت ندخل لهاذ العالم و بيدت كنتعلم خطوات لدخول عالم السحر منها الخلوة أي الاختلاء بترديد بعض الأقوال التي تجلب الجن و الشياطين و أثناء الخلوة فرضت علي أعمال لابد منها باش نوصل لمراتب عالية في السحر و يكون ليا كلمة و جاه قوي بين الناس و أهمها تدنيس كتاب مقدس (المصحف الكريم )الله يسمح ليا الأسرة ديالي كتوارث السحر أبا عن جد و تحولت لإنسانة بلا ضمير بلا وعي كنفذ كل اللي مطلوب مني وئام عندها الحق ماتبغيش ترجع حياة صعيبة و كلها رعب و خوف كتولي بحال شي دمية كيتحكمو فيك كيف بغاو كيبان أنك غتحقق كلشي اللي بغيتي و لكن كتورط فواحد العالم الي راحة فيه منعدمة تفكرت كلشي إلا أحداث 15 سبتمبر 2010 هي الحلقة المفقودة تفكرت و عقلت أنني كنت وحدة منهم كنفذ المطلوب مني نفذت كاع الشروط أولها الكفر الصريح بالله و كتبه و رسله و ملائكته و قد ما بعدتي من الله بقدر ما كتقرب من الجن و ثاني حاجة أن تحتذي ( تجعله حذاءا) بالقرآن لمدة أربعين يوما غدرت ماما و ضحيت بيها غدرت صاحبتي نهال وآية و ماجدولين و محسن قلبت على كلشي فسبيل مصلاحتي : محسن نتا غدار واش باغي تهرب مع هاذ اليهودية ـ ماشي شغلك ياوئام أنا كنبغي ماجدو و غنتزوج بيها و غنخلي ليكم هاذ الحياة نتي و ماما ربحو بيها ـ والله مانخليها فيك كانت هاذي هي الأحداث اللي دارت فبالي محسن كان متافق معانا نصبو على ماجدولين و من بعد يتزوج بيا كنت كنبغيه بزاف ولكن محسن وقع فغرام ماجدولين و قرر يبقى معاها الشيء اللي غيولد فقلبي غيرة كبيرة و حقد و قررت نتاقم علمت حليمة بقرار محسن و تعاونات معايا ما كيهمها حتى واحد حتى ولدها و محسن كان مطارد منهم و نقذ طلبهم و استحضر روح ماجدولين ماتت من بعد هاذ الجلسة و محسن نتاحر من موراها و من بعد استدرجت نهال حتى طيحتها بين يديهوم ماستحملاتش قوة السحر عليها ماتت فالبلاصة كانت صاحبتي العزيزة و فوفاتها ما طيحت حتى دمعة حينت صافي فقدت كاع الأحاسيس وجدو الأرواح ووجدنا للجلسة نهار 15 سبتمبر 2010 ولكن شنو وقع فالجلسة اللي غير كلشي و كيفاش كنت السبب وشكون صاحب السحر 9 هذا هو اللغز الوحيد اللي بقى محيرني ماكنتذكرش أحداث هاذ الليلة شفت التاريخ 14 سبتمبر غدا إن شاء الله يوم الحسم

فقت مع الفجر صليت و قريت القرءان و أنا كنفكر غير فأحداث الليلة مغتكونش ساهلة ولكن إن شاء الله مايكون غير الخير ياربي تعاونا الوقت بدا كيدوز بالزربة مع 09:00 شدينا الطريق للرباط بقا الفقيه كيقرا القرءان و كيصبرني و كيزيد يحفظني القرءان باش نواجه وصلنا مع 10:30 دخلنا للدار : بسم الله توكلنا على الله السلام علينا و على عباد الله الصالحين سمعنا الغواث مور ماتقرا هاذ الدعاء شي حد ضربنا من اللور طحنا فالأرض فاقدين الوعي ضرباتني الفيقة مع 01:00 لقيت الفقيه رابطو محسن و لا اللي كان كيتسيف ليا بصورة محسن و هو نفس الشخص اللي كان كيتهيء ليا بصورة بابا و أنا جالسة حدا ذيك الجنية بقات معنقاني و أنا هربت منها بقات كضحك : 5 سنين و نتي ماكتنعسي حتى كنعنقك اليوم خايفة مني صورتها بشعة و هي حاطة يديها على كتفي حليمة بدات كترسم شي دوائر فالأرض و كتردد شي تعاويد بدات كترجع ليا الذاكرة " ف 15 سيبمتبر 2010 كنا كنوجدو لجلسة استحضار الأرواح وطقوس السحر الأسود كانت حليمة هي النكروماسي و أنا المساعدة ديالها من بعد ماجبدنا جثة ماجدولين كان ذيك الساعة عيد ميلادي 21 وحليمة موهماني باللي باغا مساعدتي و نولي ساحرة كبيرة و الحكم كلو بين يديا غتزاد قيمتي بين السحرة ولكن فذاك النهار كتاشفت باللي أنا مجرد قربان غيضحيو بيه حينت أنا وارثة السحر و أحسن قربان ممكن يتقدم للأرواح أنا مولات السحر رقم 9 منين بدات كضحي بيا حليمة أنا رفضت و بديت كنقاوم و سببت الفوضى الشيء اللي غيتسبب فالحريق من بعد ماشمعات طاحو فالأرض و وقف كلشي " بدات حليمة كتقرب مني باش ضحي بيا و تكمل مخططاتها لخمس سنين كتنسا ليهوم الوقت المناسب بديت كنقول الآيات باش تبعد مني "وألقي السحرة ساجدين قالو آمنا برب العالمين " الآية وقفات حليمة شوية و لأن دماغي كان مشوش ماقدرتش نزيد نبعدها و بدات كتضحك : نتي رجعتي سجينة لينا يا وئام كاع داكشي اللي داز عليك ماهو غير تمهيد باش تآمني ووصلنا لهدفنا اليوم يا وئام غنكملو خطتنا كنحاول نتذكر آيات أخرى تمحى ليا كلشي بديت كنشوف فالفقيه كان مكتف و بعينيه كيطلب مني نكمل حليمة كتقرب و كضحك و أنا كنبعد غمضت عيني تفكرت العذاب اللي عشت فيه تفكرت ماما و عائلتي و صحاباتي تفكرت الناس اللي ضريتهم و اللي حمقتهم بسبب السحر و الشعوذة تفكرت فاش كنت كنسجد و كنعبد الشياطين باش نال رضاهم واش غنرجع للعذاب ثاني "لا يسمعون إلى الملإ الأعلى و يقذفون من كل جانب دحورا ولهم عذاب واصب إلا من خطف الخطفة فأتبعه شهاب ثاقب " غير قلت هاذ الآية الكريمة حتى شفت كلشي حبس و حليمة بدات كتقفف تفك الفقيه من المحاصرة و كمل الآيات " إنما صنعوا كيد ساحر ولا يفلح الساحر حيث أتى " و بدينا كنرددو بزوج الآيات { واتبعو ماتتلوا الشياطين على ملك سليمان و ما كفر سليمان ولكن الشياطين كفروا يعلمون الناس السحر و ما أنزل على الملكين ببابل هاروث و ماروث و ما يعلمان من أحد حتى يقولا إنما نحن فتنة فلا تكفر فيتعلمون منها مايفرقون بيه بين المرء وزجه وماهم بضارين به من أحد إلا بإذن الله و يتعلمون ما يضرهم ولاينفعهم ولقد علموا لمن اشتراه ماله في الآخرة من خلاق ولبئس ماشروا به أنفسهم لو كانوا يعلمون * ولو أنهم آمنو و اتقوا لمتوبة من عند الله خير لو كانو يعلمون }صدق الله العظيم سمعنا الصراخ والظلام حليت عيني لقيت راسي فالسبيطار

الجزء الأخير 

جا الطبيب : الآنسة وئام على سلامتك ـ الله يسلمك أش وقع ـ لقاوك فاقدة الوعي فواحد الدار نتي وواحد السيد ـ فين هو دابا ـ فشومبر اللي حداك دخل البوليس وبداو كيسولوني : الآنسة وئام الحمد لله على السلامة فين كنتي 5 سنين هاذي ـ ماعرفتش ماعاقلة على والو الطبيب أكد هضرتي باللي فيا ضربة فالرأس وباللي أنا فاقدة الذاكرة هضر معايا واحد البوليسي : مهم الحمد لله منين رجعتي 5 سنين و نتي مختافية وحنا كنقلبو عليك و ماعندنا عليك حتى خبار نتي رتاحي دابا القانون غياخذ مجراه خرج البوليس درت يدي على عنقي مالقيتش العقد عرفت باللي تخلصت من هاذ الكابوس شفت وجهي فالمرايا رجعت وئام مشيت نطمن على الفقيه كان حتى هو فواحد الغرفة : تبارك الله قاومتيهوم ـ من بعد الله سبحانه و تعالى الفضل كيرجع لك باقي مافهمت حاجة وحدة كيفاش عشت فجسد آخر ـ مايمكنش يابنتي يمكن يكون غير كتسيف صورتك هادشي كامل باش ماتشكي فوالو ويتحكمو فيك و الدليل غير تبطل السحر رجعتي ثاني ـ أشنو رأيك نبلغو بحليمة داكشي اللي دارت ماشي ساهل ـ ماعندناش دليل حي و يقدرو مايتيقوناش و لكن يا بنتي براكة عليها غير العذاب اللي غتعذب راك عشتي هادشي ماغتعيش مرتاحة و ديما فالعذاب وهذا أكبر جزاء و كثر من أي عقوبة على وجه الأرض عندو الحق خرجت من السبيطار جا عندي واحد السيد علمني باللي أنا الوريثة الوحيدة و كلشي الثروة مكتوبة بسميتي علمت الفقيه وقالي باش نستاغل الفلوس فأمور تنفع المجتمع مشيت للحج ورجعت إنسانة جديدة بحال إلا تخلاقيت من جديد جزء من الفلوس درتو فمشروع خيري و الجزء الآخر بنيت بيه مدرسة خاصة باش نعيش الفقيه زوجني ولدو شخص ملتازم الحمد لله وهو اللي مقابل ليا الأعمال ديالي و أنا وليت مقابلة غير صلاتي و العبادة كتاشفت حياة جديدة حياة نقية بعيد على السحر و الشعوذة و الشرك الله يسمحليا فاللي داز ولدت وليداتي و كنربيهوم فالحلال كون غير ماما حتى هي بلاصة ماتهرب و تبقى حياتها كاملة خايفة و معيشاني فالرعب كون غير تابت و هنات راسها و عاشت مرتاحة و عيشاتنا فالراحة و لكن الحمد لله على كل حال مافاتش الفوت أنا الحمد لله دابا عايشة طبيعي مابقيتش كنحلم ذوك الكوابيس تخلصت منهم كنفيق فالصباح كنتوضى و نصلي الفجر كنبقى نقرا القرءان حتى يطلع الصباح نطيب و نجمع ونقابل داري ووليدتي كيف العادة ما أجمل الحياة البسيطة مرتاحة الحمد لله كنطلب السماحة كل نهار من الناس اللي ضريتهوم و كنت سبب فهلاكهم و فليلة الجمعة و قبل ما يأذن الفجر حلمت بكاع الناس اللي شاركت معاهم جزء من حياة السحر ضاحكين و كيقولو باللي من قلبهم مسامحين ليا و حتى أنا كل جمعة كنزور قبورهوم و كنخرج الصدقات بسميتهم و خصوصا لماما ياربي تسمح ليها واخا اللي دارت ماكانش ساهل بانت ليا حليمة مع شي ناس غاديين لواحد القبر هاذ السيدة ماغاديش توب و لكن طوال الزمن ولا قصار غتخلصي ثمن أفعالك يا سحارة سالات قصتي مع السحر و الشعوذة و بدات قصة جديدة قصة حياة بسيطة و قصة عيشة مرتاحة فيها خرجت نتقدا فالسوبر مارشي تزادحت مع واحد السيدة طلبت منها سماحة تلفت لعنقها لقيتها لابسة ذاك العقد عرفت باللي القصة ماسالاتش حينت للأسف كاين بزاف ديال الناس كيمارسو الشعوذة و السحر و كيضرو الناس ولكن رتاحيت حينت نهاية الساحر ديما مؤلمة و العاقبة مكتوكنش بخير و مايقدروش يوصلو للمؤمن القوي المتشبث بدينو العقد الآن متوفر في الأسواق المغربية شكون بغا يشري ؟